كود سبور//

غادي تولي عند الوداد الرياضي وكالة أسفار خاصة بالنادي باش تواكب وتتكلف بسفريات الجماهير الودادية خارج المغرب.

واكد مصدر ودادي مسؤول لـجورنال “گود”، انه بالفعل الوداد الرياضي برئاسة هشام ايت منة قرر خلق وكالة أسفار تابعة للنادي، هدفها التكلف إداريا ولوجستيا بسفريات الجماهير الودادية باش تمشي تساند الفريق ملي يكون لاعب خارج المغرب، وتنظم الرحلات ديال المشجعين الوداديين، باش يديبلاصاو فأحسن الظروف، وانه بالفعل راه الاجراءت الإدارية بدات من طول إدارة الوداد فهاد المشروع اللي الهدف منو هو مصلحة المشجعين والنادي ويستافدو بجوج، وراه هذا المشروع غادي يكون سابقة فالقارة الأفريقية وماشي غير فالمغرب.

وجا هذا القرار بعد المشكل اللي وقع لجماهير الوداد الرياضي فكينيا بعد ماتش الفريق الأحمر ضد نيروبي، وعدد من الجماهير الودادية اللي بقاو حاصلين تما بسبب تعقيدات الديوانا ديال كينيا، قبل تدخل إدارة الوداد برئاسة هشام ايت منة وسفارة المغرب بكينيا.