گود سبور//

القضية بدات كاتحماض عند هشام آيت منة رئيس الوداد الرياضي مع المعرضين له فبرلمان الواك ووصلت للمحكمة، وهذا الشي بسبب الطريقة اللي كايسير بها النادي هادي عامين، واللي انعكست بشكل سلبي على الفريق الأحمر اللي كايحصد غير فالنتائج السلبية مدة هادي.

وكشف مصدر ودادي لجورنال “گود”، أن مجموعة من المنخرطين فالوداد الرياضي المعارضين لهشام آيت منة واللي عددهم غادي وكايتزاد، مشاو للمحكمة وتقدمو لها بطلب لافتحاص مالية النادي خلال مرحلة الرئاسة ديالو، وعدد هاد المنخرطين كثر من 50 واحد، ووضح نفس المصدر أن حتى شي منخرطين كانو معاه فاللول راه تقلبو عليه ومشاو للمعارضة.

منخرطين الوداد الرياضي باغيين يعرفو الوضعية المالية ديال النادي كيفاش دايرة ويتحاسبو مع هشام ايت منة قبل ما يمشي بحالو، مع العلم أن الأصوات المطالبة بالرحيل ديالو من رئاسة الحمرا وسط المنخرطين والجماهير ولات كثيرة، وأغلب الوداديين ما بقاوش باغيينو يبقى وحتى اللي كانو واحد الوقت معه تقلبو وولاو ضدو، بعدما وصل الفرقة للهاوية بالتسيير ديالو.