احمد الطيب كود الرباط ///

قال مصدر من وزارة الثقافة ل”كود” باللي ما تعدى حتى شي موظف او شي حد فالمعرض الدولي للكتاب على المعطي منجب. مصدر “كود” اضاف باللي منجب من حقو بحال اي مغربي يدخل للمعرض الدولي ايلى كانت عندو تيكي او من حملة البادج =منظمون وعارضون وصحافة …” مصدر “كود” اكد باللي منجب، كيف كيبين الفيديو ديالو هو، ما بغاش يدخل من باب دخول الزوار بل من باب الخروج وباللي هاد الشي ما مقبلوش لا منو لا من غيرو. كاين باب الدخول وكاين باب الخروج باش يكون الحدث منظم.

منجب كان نشر فيديو من بعد دار بيان باللي البارح 2 ماي 2026 تمنع من دخول المعرض الدولي للكتاب بالرباط.  المعطي منجب قال فبيان ليه على صفحتو باللي احتاجزوه 10 رجال امن ونكلو بيه. مصدر وزارة الثقافة قال بللي هاد الشي كذوب وادعاءات وكلشي شاهد عليها

منجب قال بالي جيت للمعرض مع الربعة شريت تذكرتي ولكن باش بغيت ندخل طوقوني رجال امن بزي مدني وفتشوني وباللي تمنع من دخول المعرض. اعتابر هاد التصرفات تعسفية. هاد الشي كيف سبق وقال مصدر من وزارة الثقافة ل”كود” “كولو كذوب” وشدد على ان الفيديو اللي نشرو كيكذب هاد الشي اللي كيقول

بخصوص المترجم عبد الرحيم حزل اللي بان فصور كيبيع كتوبتو قدام المعرض وقال اللي مشكلتو مع الناشر ديالو ماشي مع المعرض. مسؤول بوزارة الثقافة قال ل”كود” باللي المعرض ما عندو علاقة بالموضوع. حزل كان قال باللي غادي يوقع ويبيع كتابو المترجم “المخزن والامازيغ” قدام باب المعرض. دارها وقال باللي غادي يجيب نسخ اخرى اليوم باللي ديال البارح تباعت