كود سبور//

تعاقب الدولي المغربي سفيان أمرابط بماتش واحد ما يلعبوش، بسبب البطاقة الحمرا اللي كان خداها فثمن نهائي كوب دافريك “الكوت ديفوار 2023” فشهر يناير اللي فات، وبالتالي ما غيكونش غير ضد زامبيا فيونيو الجاي ضمن اقصائيات مونديال 2026.

وكشف مصدر مسؤول فالجامعة الملكية المغربية لكرة القدم فتواصل موقع “گود”، أن الاتحاد الافريقي لكرة القدم عاقب سفيان أمرابط ووقفو ماتش واحد، بسبب الطرد اللي كان تعرض له ضد جنوب إفريقيا فثمن نهائي كاس افريقيا.

وأكد نفس المصدر، أن أمرابط ما غيكونش غير فالماتش ضد منتخب زامبيا ضمن الجولة الثالثة من اقصائيات مونديال 2026، فيونيو الجاي فأكادير، وغيكون حاضر فماتش الجولة الرابعة بين المغرب ومنتخب الكونگو اللي غيكون فنفس الشهر فالكونگو.