گود سبور//

كشفت مصادر “گود” أن لاعبين المنتخب الوطني المغربي، اللي تفاعلو الحسابات ديالهم على إنستغرام مع تصاور لاعبين منتخب السنغال وهما محتافلين بكأس إفريقيا 2025 المسحوبة من السنغاليين بقوة القانون، ما فراسهم ما يتعاود واخا ليكونط ديال اللاعبين هما اللي دارو القلوب، ومن بينهم اسماعيل الصيباري.

ووضحت نفس المصادر أن الناخب الوطني محمد وهبي خلال التداريب د المنتخب الوطني المغربي دار اجتماع مع اللاعبين، وهضر معهم على هاد النقطة ديال تفاعلهم مع تصاور احتفالات لاعبين السنغال بكاس أفريقيا فإنستغرام، وقالهم بللي هاذ الشي ما كايدارش، وأنه صحيح ليكونط ديالهم ولكن هما لاعبين محترفين وكايمثلو بلاد وجمهور وخاصهم يراعيو هذا الشي ويردو له البال.

المصادر كشفت أيضا أن اللاعبين وضحو للمدرب أنهم ماشي هما اللي دارو هاد لقلوب بيديهم مباشرة للتصاور ديال لاعبين السنغال، ولكن وقع بلان تماك، وأن المسؤول على إدارة ليكونط ديالهم هو اللي دار هاد القلوب، حيث عندهم مسؤول واحد مشترك على إدارة ليكونط ديالهم فإنستغرام ومواقع التواصل، هما وشي لاعبين د السنغال، وأنهم ديجا كايتعارفو هما واللاعبين السنغاليين وكايشجعو بعضياتهم، وهاذ الشي اللي مشى عليه هذا المسؤول اللي مقابل لهم ليكونط فأنستغرام داكشي علاش دار قلوب من حسابات هاد اللاعبين المغاربة لتصاور احتفالات لاعبين د السنغال بكاس إفريقيا المسحوبة من السنغال بقوة القانون.

وكعاو المغاربة ملي شافو لاعبين مغاربة دارو قلوب فإنستغرام لتصاور لاعبين السنغال وهما محتافلين بكاس إفريقيا 2025، اللي مازال الاتحاد السنغالي ما بغاش يسلمها، واخا حكمت لجنة الاستئناف بالاتحاد الإفريقي لكرة القدم بسحب اللقب من السنغال ومنحو للمغرب، واعتبرت السنغال خاسرين الفينال بنتيجة 3-0، حيث المنتخب السنغالي انسحب من الماتش.