گود سبور//

علم جورنال “گود” من مصادر موثوقة أن المنتخب الوطني المغربي يقدر ما يلعبش مع منتخب غانا الماتش أميكال المبرمج ما بين المنتخبين يوم الاحد 4 أكتوبر فطنجة، وهذا الشي واخا الجامعة الملكية المغربية لكرة القدم، وجدت لهذا الماتش ووفرت كل الظروف باش يتلعب وفالمستوى الكبير.

ووضحت نفس المصادر، أن المشكل كاين فالاتحاد الغاني اللي من بعدما توصلت الجامعة الملكية المغربية لكرة القدم معه لاتفاق مدة هادي باش يتلعب الماتش، هما اللي ما قادرينش يجيو يلعبو الماتش فالمغرب حيث ما عندهمش الإمكانيات، أما الجامعة الملكية المغربية لكرة القدم راها ملتزمة بإقامة الماتش الودي للمنتخب الوطني المغربي فطنجة وفنفس الموعد.

المصادر نفسها كشفت أن الجامعة الملكية المغربية لكرة القدم، بدأت اتصالاتها مع منتخبات اخرى باش تشد معها فبلاصة منتخب غانا، ومن ابرز المنتخبات اللي ممكن يلعب معها المنتخب الوطني المغربي فبلاصة الغانيين كاين منتخب مالي.