كود سبور//

توصلو اللاعبين السابقين ديال يوسفية برشيد اللي دارو وقفة احتجاجية قدام مقر الجامعة الملكية المغربية لكرة القدم والعصبة الوطنية لكرة القدم الاحترافية اليوم الاثنين، بتطمينات بخصوص قضية المستحقات ديالهم العالقة.

وكشفت مصادر “گود”، أن اللاعبين السابقين ديال يوسفية برشيد اللي العدد ديالهم كثر من 19 لاعب، ملي دارو وقفة احتجاجية قدام مقر الجامعة الملكية المغربية لكرة القدم، احتجاجا على الوضع ديالهم، تواصل معهم الكاتب العام للعصبة الوطنية لكرة القدم الاحترافية. وقالهم أنه غايشوف لهم موعد لقاء مع رئيس العصبة عبد السلام بلقشور، باش يعاودو له مشكلهم.

وحسب نفس المصادر، فاللاعبين السابقين ديال يوسفية برشيد كايقولو انهم مازال ما توصلوش بمستحقاتهم الصدارة فيها أحكام من العصبة الوطنية لكرة القدم الاحترافية لمصلحتهم ضد فريقهم السابق يوسفية برشيد، وبمقابل ذلك تم السماح للفريق بالقيام بانتدابات وتسجيل اللاعبين الجداد وهما باقيين ما خداوش رزقهم، وكايستغربو من هذا الشي.