گود سبور//

غيدير الاتحاد الإفريقي لكرة القدم، الجمعة الجاي، اجتماع مهم فالمغرب، لتدارس مستجدات الكورة الإفريقية.

وحسب مصادر “گود”، فاللجنة التنفيذية ديال الاتحاد الإفريقي لكرة القدم غتدير اجتماع فمركز محمد السادس لكرة القدم فالرباط الجمعة الجاي، وغيكون هذا الاجتماع برئاسة رئيس الكاف باتريس موتسيبي.

اللجنة التنفيذية ديال الاتحاد الإفريقي غتناقش مجموعة من الأشياء كتهم الكورة الأفريقية ومن بينها البطولات القارية ديال المنتخبات بحال موعد إقامة كأس إفريقيا 2025 اللي غينظمها المغرب، ومازال ما تعلنش بشكل رسمي على الموعد ديالها، والنسخة الثانية من السوبر ليگ الأفريقي وباقي المسابقات.

للإشارة فالمغرب كينظم دابا كأس إفريقيا لكرة القدم داخل القاعة، وكان رئيس الاتحاد الأفريقي باتريس موتسيبي حاضر فالافتتاح ديالها قبل أيام، ومشى من وراها دار جولة فعدد من البلدان الأفريقية، وغيرجع المغرب باش يحضر الاجتماع ديال اللجنة التنفيذية للكاف الجمعة الجاي والاحد يحضر فينال كأس إفريقيا للفوتسال.