كود سبور//

نايضة فالوداد الرياضي بسبب الوضعية التسييرية الكارثية اللي وصل الرئيس هشام ايت منة النادي، وعدد من المنخرطين بداو كايتحركو باش يتحاسبو معه بعدما بهدل الفرقة، وباغيين يعرفو لفلوس د النادي فين كاتمشي فالمرحلة ديالو.

وكشفت مصادر ودادية لجورنال “گود”، أن عدد من منخرطين ديال الوداد الرياضي ما نعسوش الليلة اللي فاتت بعد التعادل ضد الدفاع الحسني الجديدي، اللي ما تقبلوهش الوداديين لا هو لا المستوى الكارثي اللي قدموه اللاعبين، اللي جايبهم هشام ايت منة بالزبابل د الفلوس من ميزانية النادي بلاما يعطيو شي اضافة ولا يقدمو المستويات المروجة منهم.

ووضحت نفس المصادر أن منخرطين الوداد باغيين يديرو افتحاص لمالية النادي فهاد الفترة اللي دوزها هشام ايت منة كرئيس فالواك، وانهم بداو كايجمعو التوقيعات ديالهم دايرين واحد اللائحة باش يبداو الإجراءات القانونية لافتحاص الوضعية المالية ديال الوداد باش يعرفو الفلوس اللي كاتدخل الحمرا وفاش كايصفرها الرئيس هشام ايت منة.

ونايض الصداع على ايت منة وسط الوداد الرياضي، والجمهور ما بقاش باغيه حيث فشل فالحمرا، والبارح بعد نهاية ماتش الوداد والجديدة فستاد دونور سبوه وقالو له يمشي بحالو بعدما وصل الفرقة للحيط، وما حقق والو من الوعود اللي عطاهم، والأكثر من هذا الشي تاهموه بأنه تابع غير لفلوس وما مسوقش للألقاب.