كود سبور//
كشفت مصادر من الجامعة الملكية المغربية لكرة القدم، أن اللجنة المنظمة للماتشات الوديين بجوج ديال المغرب ضد تونس وبنين، الملعوبين يومين 6 و 9 يونيو فتيران فاس الكبير، قررت اعتماد خطة مدروسة لتفادي المارشي نوار والتغلب على ماليه حيث كانوا كايهلكو جيوب الجمهور فكل مناسبة.
ووضح مصادر جامعية لـ “گود”، أن اللجنة المنظمة وبعدما حطات تذاكر ماتش المغرب وتونس للبيع على المنصة الإلكترونية المختصة يوم السبت الماضي مع 11 النهار، تباعت منها 14 ألف تذكرة، وقفت البيع بقات كل يوم كاتحط دفوعات من التذاكر للبيع حتى سالاو التذاكر لتفادي صحاب المارشي نوار، اللي كانو كايطيحو على التذاكر فمرة واحدة وكايشريو منهم عدد كبير ويقلبو فيهم البيع، وملي كايدخل الجمهور اللي باغي يتفرج يقطع ما كايلقاش التذاكر، وكايكون مضطر انه يمشي يشري التذاكر من المارشي نوار زايد فالثمن.
نفس المصادر وضحت ان تذاكر ماتش المغرب وتونس كان عليها إقبال كبير، والدليل ان الماتش غايتلعب بگيشي فيرمي حيث التذاكر كلهم تباعو، وكشفت أنه بعدما سالاو التذاكر توصلت المنصة المكلفة بالبيع بكثر من 200 ألف طلب آخر لشراء التيكي.
