گود سبور//

داز ديربي الدار البيضاء بين الوداد والرجاء الرياضيين، يوم السبت الماضي، فتيران مركب محمد الخامس بالدار البيضاء برسم الدورة 26 من البطولة الاحترافية، بخير وعلى خير ما كان صداع لا مشاكل، أول ديربي داز بخير لا طوموبيلة تهرسات ولا مضاربة وقعات ولا مواطنات ومواطنين تگريساو.

حسب مصادر جورنال “گود” عن السلطات بمدينة الدار البيضاء، فماتش الديربي بين الوداد الرجاء الرياضين اللي بدا السبت اللي فات مع 8 الليل وسالا مع 10 الليل فستاد دونور، داز بخير وسط أجواء مزيانة، والسلطات ما سجلات حتى شي مضاربة وحتى شي حالة شغب فالديربي وحتا حد ما تعرض  لاعتداء أو گريساج، وما كان لا تخريب ديال الممتلكات العامة والخاصة وما كانت لا شفرة ديال المحالات لا والو.

نفس المصادر وضحت أن هذا الديربي ديال السبت الماضي، كان آمن وكلشي كان فيه مزيان، والمشجعين اللي جاو كانو منضبطين وجاو تفرجو ومشاو بحالهم بلا صداع وبلا فوضى.

للإشارة فالديربي بين الوداد والرجاء السبت الماضي عرف غياب الجمهور ديال الفريقين بعد اتحاد الإلتراس المشجعين للناديين، اللي قاطعو بجوج الديربي احتجاجا على بزاف د الحوايج منها الفصل 507 اللي كايتحاكمو به المشجعين وأعضاء الألتراس، وستاد دونور اللي عام ونص وهو مسدود بسبب الإصلاح والتأثير ديال هذا السدان على الفريقين ماليا، ومنع تنقل الجمهور لحضور الماتشات فمدن أخرى.

وكان جدل كبير حول فشل الديربي من ناحية الجمهور حيث بزاف ديال المشجعين اللي جاو حضرو كانو كايبانو لا علاقة ليهم بالوداد والرجا وغير عارضين عليهم، والشوهة هي صورو هشام ايت منا رئيس الوداد كايفرق التذاكر د الماتش على الجمهور فالزنقة، وواخا هاكداك الجمهور ما جاش بزاف.