گود سبور//

داخلين الرجاء الرياضي على جمع عام غير عادي، غايتنتخب فيه رئيس جديد للنادي ضمن مرحلة جديدة عنوانها “الشركة الرياضية” وهي المرحلة اللي باغيين الرجاويين يكون فيها استقرار مالي واداري خصوصا وانها غاتكون بمساهمة ديال “مارصا ماركو” المحتضن التاريخي للنادي.

الصراع على كرسي الرئاسة بالرجاء الرياضي شعالة فيه العافيا بين الثلاثي الرئيس المؤقت الحالي عبد الله بيرواين والرئيسين السابقين جواد الزيات وسعيد حسبان، وهذا الصراع بين هذا الثلاثي راه سخن قبل ايام قليل من موعد الجمع العام يوم الاثنين الجاي، اللي فيه غايطلع واحد فيهم كرئيس جديد للرجا.

المؤشرات الأولية كاتقول ان الرجاويين باغيين كاخيار اول جواد الزيات يكون رجل المرحلة المقبلة بالنظر لما قدم فالتجربة ديالو السابقة كرئيس ولو عليه مؤاخذات بحال ملي قرر الاستقالة وقبل منها طريقة تدبير عقود اللاعبين اللي سنا معهم ملي كان رئيس ومبالغ الصفقات، وكخيار ثاني عبد الله بيرواين اللي كايبقى التواجد ديالو فالمكتب ديال الرئيس السابق عادل هالا هي نقطة الضعف ديالو، من غير ان المنافسين ديالو كايشوفو انه استغل مرحلة الرئاسة المؤقتة لابرام صفقات والتجديد مع الركائز باش يروج لراسو، اما سعيد حسبان فبزاف ديال الرجاويين رافضين انه يرجع للرئاسة، بسبب المرحلة السابقة ديالو كرئيس واللي عرفت مشاكل كثيرة مع المنخرطين والجمهور، ولكن وحسب مصادر جورنال “گود” فالكواليس فيها حوايج اخرين ومؤشراتها تقدر تگلب كلشي وتفاجئ الرجاويين.

مصادر “گود” كشفت ان داكشي اللي كايروج على مواقع التواصل الاجتماعي وفيسبوك ويناقش فالقهاوي حدا الوازيس وفشوارع الدار البيضاء حاجة، والكواليس داخل الرجا حاجة اخرى، وان ترشح عبد الله بيرواين وجواد الزيات كل واحد بوحدو خدام غير لسعيد حسبان واستفد منو بزاف.

ووضحت نفس المصادر، ان عدم قبول عبد الله بيرواين وجواد الزيات بالتنازل لبعضياتهم ضمن حل لائحة واحدة يكون فيها واحد منهم رئيس والآخر نائب له، غايخلي أصوات المنخرطين اللي متعاطفين معهم تنقسم بيناتهم يوم الجمع العام، وهذا الشي كلُ فمصلحة سعيد حسبان، اللي خدام فالسكات وكايحاول يستغل الأسماء اللي عندو فاللائحة باش يجمعو اكبر عدد من أصوات المنخرطين صحابهم، وبالتالي راه ولات عندو حظوظ حتى هو، فالوقت وحسب نفس المصادر كانت غاتكون الحظوظ ديالو ضعيفة بزاف كون ترشح بيرواين والزيات بلائحة واحدة فيها توافق، ويترشح فيهم واحد بلا ما يدخلو بجوج الانتخابات، وانه فهاد الحالة كان توقع ان اللي يترشح فيهم يكتسح حسبان فالانتخابات ويربحو بنتيجة كبيرة من الأصوات.

نفس المصادر كشفت انه واخا المؤشرات كاتقول بلي جواد الزيات غايجيب اكبر عدد من الأصوات ومن وراه عبد الله بيرواين، ولكن كلشي هذا الشي كايبقى غير تكهنات، حيث الكواليس فالرجا اللي خدمها هو اللي كاينجح، وهذا الشي معتمد على علاقة كل مرشح وأعضاء اللائحة ديالو بالمنخرطين، وانه كاينين منخرطين كاتهمهم مصلحة الرجا ومهتمين بدراسة مشروع كل مرشح والتصويت على المشروع وبروفايل المرشح واللائحة، واللي صعيب هو انه كاينين منخرطين اللي كايصوتو على صحابهم غير حيث صحابهم او مستافدين منهم، وكاينين منخرطين اللي كاتهمهم مصالحهم الشخصية وما عندهم غرض لا بالمشروع ولا بالكفاءة المهم يستفادو، وهادو راه عددهم مهم وكايعطو وجه لكل مرشح ونهار الجمع العام كايتبعو مصلحتهم ماشي كايصوتو على البرامج او المرشح اللي عطاوه الكلمة.

وهذا الشي كامل كايخلي الجمع العام الانتخابي ديال الرجاء الرياضي، مفتوح على جميع التوقعات وكل مرشح سوا عبد الله بيرواين او جواد الزيات او سعيد حسبان عندو الحظوظ ديالو، ولو ان بزاف ديال الرجاويين كايتوقعو فوز جواد الزيات بدرجة أولى وعبد الله بيرواين بدرجة ثانية وان سعيد حسبان صعيب يربح.