كود سبور//

كايعيشو الرجاء الرياضي أزمة حقيقية، وحتى حد ما قادر يتخذ شي خطوة ولا عندو الحل للوضع الغامض اللي كايدوز منو الفريق حاليا، خصوصا بعد ماتش الكلاسيكو اللي خسروه مع الجيش الملكي البارح الثلاثاء، برسم الجولة 1 من دور مجموعات دوري أبطال إفريقيا، وقضية توني الخريطة واللاعب الجزائري يسري بوزوق.

وحسب مصادر رجاوية مطلعة، فماكاينة حتى شي استقالة حتى الآن من طرف أعضاء المكتب المديري اللي على راسو عادل هالا، وحتى حد ما عبّر بشكل رسمي وواضح على أنه غايمشي بحالو بسبب الوضع الحالي، واستبعدت نفس المصادر استقالة شي واحد منهم خلال الساعات او الأيام المقبلة.

وبخصوص المدرب د الفريق، وضحت نفس المصادر أن ريكاردو سا بينتو راه مازال مستمر فالبوسط ديالو، وإلى بغاو الرجا يصيفطوه بحالو خاصهم يخلصو ليه الشرط الجزائي اللي هو 500 مليون سنتيم، وهذا المبلغ صعيب يعطيوه له الرجا فهاد الوقت اللي كايعيش فيه الفريق أزمة مالية خانقة، داكشي علاش هما في موقف ضعف أمام المدرب اللي ما قدر يحقق حتى شي رباح ملي جا للخضرا بعدما لعب 7 الماتشات تعادل فـ5 منهم وخسر 2، آخرها مباراة الكلاسيكو البارح ضد ليفار، والمشكل أن حتى الأسلوب ديال الرجا موضرو والفريق كايبان لاعب بلا هوية.

وعبرت نفس المصادر، عن خوفها على مستقبل الرجاء الرياضي بسبب المرحلة الصعبة اللي كايدوز منها الفريق الاخضر حاليا تحت رئاسة عادل هالا، اللي طلع رئيس قبل شهرين بشكل مفاجئ بعد توقيف الرئيس السابق محمد بودريقة بألمانيا بسبب المشكل اللي عندو، وكايشوفو الرجاويين أن النتائج السلبية اللي كايجنيها الفريق حاليا هي نتيجة ديال العشوائية فالتسيير ديال المكتب الحالي برئاسة هالا وأن الرجا ولات رهينة بين يديه والمستقبل ضبابي ديال النادي والقضية مرونة.