كود سبور//

كايتسناو الرجاء الرياضي يرجع المدرب الألماني جوزيف زينباور للمغرب فهاد اليومين، باش يكمل خدمتو مع الفريق حيث مازال له موسم واحد مع الخضرا، أو أنهم يسلكو معه القانون.

وكشفت مصادر رجاوية، أن إدارة الرجاء الرياضي كايتسناو جوزيف زينباور يرجع من ألمانيا إلى المغرب، بناء على آخر خرجة دار فأنستغرام ديالو، واللي أكد فيها أنه مازال مدرب للرجا بعد انتشار أخبار كتقول بأنه سنا مع الوحدة السعودي.

نفس المصادر، وضحت أن إدارة الرجا غاديين بنية حسنة مع جوزيف زينباور حيث أكد أنه مازال مدرب للخضرا وكايتسناوه يرجع للمغرب باش يمشي مع الفريق إلى تونس حيث عندهم معسكر تدريبي تما وماتش أميكال ضد الترجي التونسي، ولكن وفنفس الوقت فمسؤولين الرجا موجدين لكل الاحتمالات ومنها إلى ما رجعش زينباور يوم الثلاثاء الجاي وهو اليوم المحدد لسفر الفريق إلى تونس، وفهاد الحالة غايطبقو معه القانون حماية لمصالح النادي.

وأكدت نفس المصادر، أن إدارة النادي ما غاديش تتنازل على حق الرجا، وأن جوزيف زينباور إذا كان باغي يمشي بحالو يمشي، ولكن يخلص الشرط الجزائي لفسخ العقد اللي هو 220 مليون سنتيم.

أما فالسعودية، فالأخبار ديال تعاقد جوزيف زينباور مع الوحدة السعودي مازال كاتنتشر، وآخرها جريدة “الرياضية السعودية”، اللي نشرت اليوم الاحد بورتريه عليه حيث قريب يدرب الوحدة خلال الموسم الجديد كيفما قالت.