كود كازا//

القضية حماضت ماشي فقط عند اللي خذاو الملاير باش ينجزوا مشروع فيه 1376 شقة و63 محل تجاري وقطع أرضية من ثلاثة الطوابق وغيرها فسيدي معروف الدار البيضاء، بل عند الضحايا، اللي هادي سنين وهما تيتسناو يحصلوا على الشقق اللي شراوها، بعدما توقف المشروع ومشات الفلوس، خصوصا أن الناس كاين العديد اللي دفعوا الثمن كولو والعيان عطا تسبيقات وصلات أزيد من 15 مليون. 1200 واحد اللي شراو على الأقل، والبرطمات اللي تبناو ما فايتينش 400.

دابا دوك اللي مشاو للمحاكم ودارو حجوزات على الأقل غادين يشدو الصف، باش يشوفو شنو غيبقى ليهم، أما اللي بقاو تيحلموا بالوعود ضربهم تران.
المهم الأخبار الجديدة هي أن المحكمة التجارية توصلات قبل أسبوع بمطالب البنك، 50 مليار، يعني أن الحساب البنكي تاع الشركة تم إغلاقه، وهذا تيعني أيضا أن المساطر غادا تمشي ديريكت نحو المطالبة بالأداء، أو ما يسمى بالإنذار العقاري، ومنين يتحقق، غتعمل خبرة ويدوز المشروع في المزاد العلني، ويدخلو ليه المقاولين يشيروه.

مالين المشروع خداو فلوس كثيرة الملايير ومبانتش، منذ 2011 وهما كياخذوا الكريديات، بسبة إنجاز هد المشروع. وفي 2019 بدات الاحتجاجات ديال الضحايا حيث متسلموش داكشي اللي شراو، هاذ الوقفات كانت أمام مبنى عمالة عين الشق حيث المشروع تينتمي ليها.

ودارو عاوتاني بروتوكول اتفاق باش البنك تشرف على المشروع معا هاد المنهشين، في 2020 وقالو الناس مزيان، لكن حليمة عادت إلى عادتها القديمة، ووصلات القروض بالفوائد 50 مليار.

المهم من بعد صحاب المشروع ناضو تيقلبو على شي حلول باش يعطلو الأزمة، وتمكنوا من إخماذ الاحتجاجات، وبداو في التنوعير، ولكن الأهم مداروهش، وهو يأديو البنك الأقساط تاعوا وتفقمات المشكلة حتى ولات دابا غادا للبيع في المزاد العلني، وفكها يا من وحليتها.