واحد المشرمل بمقاطعة العيايدة فسلا استغل تواجد مديرة إعدادية البخاري بوحدها فالدار هي وولدها الصغير، ومشى كيدق عليها فدارها ديال السكن الوظيفي وبقى كيخسر فالهضرة من السمطة لتحت والكلام الخاسر وطعن فشرفها وهددها بالذبح.

ووقعت هاد الحادثة، مؤخرا، وتعتقات فيها المديرة بعدما عيطات البوليس وجاو دارو اللازم وقرقبو عليه مع 3 ديال صباح.

وهادي ماشي أول مرة كيوقع فيها هاد الشي، راه من قبل واحد العساس حصل فتسجيل كيدير شي حاجة فخزان الوقود ديال سيارة المقتصدة باش يخسر ليها الطومبيل ويدير ليها الابتزاز.

ووفق معطيات توفرت من مصادر عدة، راه كاين شي مدراء كيدور مع مجرمين وشمكارة باش يعطيوهم التيقار.

وعلى ما قالت المديرة اللي غادة دير شهادة طبية راها مبقاتش قادرة تخدم فهذيك المؤسسة من بعد حالة الرعب اللي عاشتها.

وكتعاني هاد الإعدادية وبزاف ديال المؤسسات فسلا من انتشار الشمكارة والمشرملين في محطيها باستمرار، وكذا من مشكل احتلال الباعة المتجولين وحتى البزنازة لعدد من جنبات هاد البنايات التعليمية.

وهذا ما تعيشه فاحصين، حيث مؤسسات ابتدائية كاملة محاصرة بأسواق عشوائية والسلطة والأمن عجزوا عن توفير الأمن لهاذ المؤسسات.