أميمة عطية – كود كازا ///

تبلوكا اللقاء اللي كان مرتقب يجمع تحالف اليسار برئيسة الحكومة المعينة فاطمة الزهراء المنصوري، بعدما ما توافقوش على المكان اللي غادي يتعقد فيه الاجتماع حسب معلومات توصلات بها “كود” .

وحسب نفس لمعطيات ، كان التحالف ناوي يتلاقى بالمنصوري غدا الجمعة 2 أكتوبر، فإطار المشاورات المتعلقة بتشكيل الحكومة، ولكن تحالف اليسار ما بغاوش يكون اللقاء فمقر حزب الأصالة والمعاصرة فالرباط، وطالبو بأن يتعقد ففضاء مستقل عن مقرات الأحزاب السياسية.

وكان جمال العسري، منسق تحالف اليسار والأمين العام للحزب الاشتراكي الموحد، أكد لـ“كود” هاد الصباح أن المنصوري تاصلات بالتحالف، ولكن باقي ما تحدد حتى موعد رسمي للقاء، مضيفا أن “باقي كاين بزاف ديال النقط خاصها تتحل” قبل أي تحرك أو لقاء.

ومن بعد، خرج تحالف اليسار هاد لعشية ببلاغ توصلات ” كود” بنسخة منو ، أكد فيه أن المنصوري تاصلات بالأمينين العامين للحزبين المشكلين للتحالف، عبد السلام العزيز وجمال العسري، من أجل عقد لقاء، وأن التحالف عبر مبدئيا على الموافقة.

ولكن التحالف وضح أنه طالب بأن يكون اللقاء ففضاء مستقل عن مقرات الأحزاب، باش يكون عندو طابع مؤسساتي، خصوصا وأن الأمر كيتعلق برئيسة حكومة معينة وأمناء عامين لأحزاب سياسية.

وحسب نفس البلاغ، ومع صعوبة التوافق حول مكان عقد اللقاء، واعتبارا أن المنصوري كتجري المشاورات بصفتها الحزبية كمنسقة للقيادة الجماعية لحزب الأصالة والمعاصرة، تعذر تنظيم اللقاء اللي كان مرتقب غدا الجمعة.

وجدد التحالف التأكيد على مواصلة النضال والترافع من أجل الحرية والكرامة والعدالة الاجتماعية والديمقراطية والمساواة الفعلية، حسب ما جا فبلاغو.