مصطفى الشاذلي – كود سبوز ///

بيان الاتحاد السينغالي لكرة القدم البارح على اجواء وصول المنتخب ديالهم للرباط ومشاكل الإقامة والتداريب وحتى التذاكر، غريبة من منتخب باش وصل للمغرب وهو عايش السعادة. كلشي مهلي فيه. شجعوه لمغاربة وقدمو ليه الدعم.

علاش فشي شكل؟ العلاقات بين الدولتين مزيانة بزاف وكاينة اجتماع اللجنة العليا المشتركة بين الرباط وداكار عندنا السيمانا الجاية. العلاقات بين الجامعة واتحاد كرة القدم حتى هي مزيانة.

دابا مدرب وجامعة السينغال لكرة القدم كتمارس ضغوط علينا وعلى الكاف قبل الإعلان على لاربيط.

نبداو من اللول. السينغال قبل ما يوصلو للرباط من طنجة فالتران دارو بيان. فيه وقتاش يوصلو. الخطأ خطأهم باش وصلو للمحطة ولقاو الناس. لو دارو بحال باقي المنتخبات ما كان يوقع حتى مشكل. حتى دابا ما وقع والو. بالنسبة للاجراءات الامنية للوفد. راه الكاف اللي كتوجدهم. حسب ما عملته “كود”، جميع المنتخبات كان عندهم نفس العدد من عناصر الامن الخاص باش يأمنوهم.

فحالة المغرب مثلا عندو بالإضافة إلى ناس الكاف، فريق ديالو كيكون معاه فين ما مشى. واش السينغال عندهم؟ موحالش.

بالنسبة التداريب، راه كان فراسهم فين يدربو. راه أكاديمية محمد السادس بسلا اللي غاديين يترينو فيها مدينة. فيها 11 ملعب. فيها مقر الفيفا الجهوي. كيفاش يتجسسو عليك لمغاربة.

وهاد الشي راه الكاف اللي كتشرف عليه ماشي لمغاربة.

بالنسبة للتيكي. راه الكاف عطاتكم 5 بالمائة لجمهوركم. علاش هاد الهجوم. لمغاربة من بدا الكان وهو كيدعم منتخبكم. كيدعم جمهوركم. لمغاربة كانو معاهم فنص النهاية بطنجة ضد مصر

حسب اللي متبعين الشأن السينگالي راه اللي وقع من بيانات وتصريحات غير تصدير لأزمة داخلية. طرفاها الرئيس باسيرو ديوماي فاي ورئيس الوزراء ديالهم عثمان سونكو.

ها الاخير كان سبب فوصول الرئيس للحكم ودابا نايضة بيناتهم.

كاينة مشكلة فالحكم فاقتسام السلطة وصرفوها فهاد الماتش النهائي اللي ملعوب غدا فالرباط ضد الأسود