عمر المزين – كود///

شارك أشرف بوقضيب، مغربي، فتحقيق رقم قياسي عالمي جديد تسجّل رسميًا عند Guinness World Records، وهاد الشي كان فـ تظاهرة دولية تنظّمات مدينة سيدني بأستراليا.

هاد الرقم القياسي كيتعلّق بأكبر عدد ديال المشاركين فـ حدث ديال التواصل المهني السريع (Business Speed Networking)، اللي جمع 1108 مشارك، فـ لقاء نظّماتو منظمة Business Network International (BNI) نهار 20 نونبر 2025، فـ ولاية نيو ساوث ويلز.

الحدث كان مبني على فكرة مبتكرة كتسهّل التعارف السريع وخلق فرص فـ مجال الأعمال، وخلّى مهنيين ورواد أعمال وفاعلين اقتصاديين من بلدان وخلفيات مختلفة يتلاقاو ويساهمو فـإنجاز عالمي. وبحسب الشهادة الرسمية ديال Guinness World Records، أشرف بوقضيب كان من بين المشاركين اللي ساهمو فهاد النجاح.

هاد الإنجاز كيبان الدينامية ديال الشبكات المهنية الدولية، وكيأكد حتى على الحضور المغربي فالتظاهرات الاقتصادية الكبيرة على الصعيد العالمي.