وكالات//

قررات واحد المشاركة في مسابقة ملكة الجمال في جنوب إفريقيا أنها تنساحب من المسابقة بسبب الأصول ديالها لي دارت روينة كبيرة في البلاد.

ودارت تشيديما أديتشينا واحد البوسط على الكونط ديالها عى إنستغرام كتقول فيه أنه “حفاظا على سلامة العائلة ديالها قررات أنها تنساحب من المسابقة”.

وكيجي هادشي في الوقت لي وصلات فيه القضية ديالها للبرلمان، وولات بزاف ديال الأخبار كتقول أن الوالدة ديالها ماشي من جنوب إفريقيا وأنها من نيجيريا.

الوصول ديالها للدور النهائي والروينة لي نوضاتها خلا البوليس يحل أونكيط بعدما راجت أخبار على أن الوالدة ديالها نيجيرية وزورات الهوية ديالها.