ݣود-بني ملال//

ساكنة جماعة أيت تمليل فإقليم أزيلال خرجو هاد الصباح ديال الاحد فمسيرة احتجاجية كبيرة وسلمية من دواوير تسلنت نومديوال، كيحتجو على “العزلة الخانقة” اللي ولات كتعيشها مؤخراً بعدما الشتا الكثيرة والرعد قطعو الطريق الرئيسية اللي كتوصل لمركز الجماعة.

الرجال والعيالات وحتى الدراري شاركو فالمسيرة، ورفعو شعارات كينددو فيها بالوضعية وطالبو بفك العزلة وإصلاح الطرق اللي تخربو، خصوصاً حيت الموسم الدراسي وصل وصعيب يوصلو للمدارس ولا للمراكز الصحية.

المحتجين طالبو السلطات المحلية والإقليمية يتدخلو بسرعة باش يحسنو البنية التحتية، وأكدو أن هاد المعاناة كتعاود مع كل مرة كتنزل الشتا، وما كايناش حلول دائمة كاتضمن ليهم حق التنقل والوصول للخدمات الأساسية.

حتى فعاليات محلية عبّرات على تضامنها مع مطالب الساكنة، وعاودو طالبو يتبرمجو مشاريع تنموية باش يفكو العزلة على هاد الدواوير المتضررة.