كود الرباط//
شكلت المسيرة السلمية والحضارية اللي خاضوها سكان الدواوير الجبلية لمنطقة آيت بوكماز بإقليم أزيلال خلال الأيام الماضية، رسالة للمسؤولين المحليين والجهويين بالمنطقة، وعلى رأسهم رئيس مجلس جهة بني ملال “البامي” عادل بركات، باش يلتفتو للمشاكل البسيطة اللي كيعيشوها هاد الناس بحال الطريق والطبيب وشبكة التيليفون والأنترنت.
وفتعليق على الموضوع، أكدت فاطمة الزهراء المنصوري رئيسة القيادة الجماعية لحزب البام، أن “العالم القروي ما يمكنش يبقى فوضع المتفرج على التنمية اللي كتعرفها المدن”، وقالت إنه “يجب أن يتم التجاوب محليا وجهويا مع مطالب الساكنة”، وأضافت أن هناك مجموعة من الجماعات في المنطقة “كيحسو راسهم بأنهم مقصيين من التوازن المجالي.. وهذا أمر واقع”.
كلام بنت الباشا وإن كان مبطن، فيه رسالة واضحة بأن المناطق والدواوير المهمشة واللي كتعاني الهشاشة، هي معروفة على الصعيد الجهوي ويجب التحرك للتعامل معها بجدية، بحيث أن القرارات اللي كتخص هاد الجهات يجب اتخاذها محليا وجهويا من طرف المنتخبين المحليين بدل انتظار المركز.
هاد الاحتجاجات وضعت بالتأكيد رئيس مجلس جهة بني ملال خنيفرة عادل بركات، وكذلك رئيس الجماعة المنتمي للبيجيدي، في عين العاصفة، بحيث أنه الآن هم مطالبين باش يقدمو الحصيلة، ويبينو حنة يديهم فالميدان، بدل ترديد الشعارات اللي ملو من سماعها سكان دواوير آيت بوكماز.
