گود سبور//

كايعيش الرجاء الرياضي على تداعيات المستوى المتوسط اللي بان به الفريق فالجوج ماتشات الاولين من البطولة الاحترافية وخصوصا بعد الجولة الثانية ضد الجيش الملكي، اللي بان فيها الفريق الاخضر ضعيف وكايلعب بطريقة ماشي ديالو.

وكشفت مصادر مطلعة أن لسعد الشابي وبعد الماتش ضد الجيش الملكي الاربعاء الماضي، أصبح مهدد بالإقالة من تدريب الفريق بسبب مستوى الخضرا فالكلاسيكو ضد ليفار وحتى طريقة اللعب اللي بدات كاتكون قناعة عن إدارة النادي وهي أن الشابي ما شي هو مدرب المرحلة.

نفس المصادر، وضحت أن من المرشحين لقيادة المرحلة المقبلة فالرجاء الرياضي بعدما تسالي القصة مع لسعد الشابي اللي مازال حتى لدابا مدرب في انتظار تطورات الساعات المقبلة، كاين التونسي نصر الدين نابي المدرب السابق لفريق الجيش الملكي، واللي عندو طريقة لعب كاتمشي مع أسلوب الرجا، وكاين الجنوب افريقي فادلو ديفيز مدرب سيمبا التنزاني اللي فايت له خدم فالرجا كمدرب مساعد قبل الموسم الماضي، وكاين الإسباني خوسي ريفيرو المدرب السابق للأهلي المصري واورلاندو بيراتس الجنوب افريقي، وحتى هو ممكن يدرب الخضرا ومرشح، وهذا الشي طبعا في انتظار تحديد مصير لسعد الشابي فالساعات اللي جايين حيث مازال هو المدرب ديال الخضرا.