كود – وكالات//

كيحذر ديفيد ساكس، المستشار ديال الرئيس الأمريكي دونالد ترامب من أنه إلى طولات الحرب بين إسرائيل وإيران ممكن إسرائيل توصل حتى للتفكير فاستعمال السلاح النووي.

ساكس قال هاد الكلام فحلقة من البودكاست ديالو المعروف All-In Podcast، اللي عندو تأثير كبير وسط رجال الأعمال والمستثمرين فـوادي السيليكون، وبهاد التصريح ولى تقريباً أول مسؤول قريب من إدارة ترامب كيعبّر علانية على القلق من الطريقة اللي غادة بها الحرب بين أمريكا وإسرائيل ضد إيران.

وقال ساكس إن إسرائيل دابا كتتعرض لضربات قاصحة ما عمرها عرفات بحالها، وخا أن الحرب الحالية دازت عليها غير جوج سيمانات، وقارن هاد الشي مع الحرب اللي وقعات فـيونيو 2025 واللي دامت غير 12 يوم، وقال إن الصواريخ والطائرات المسيّرة الإيرانية ضربو بزاف، ولكن الخسائر فالأرواح والدمار والنزوح اللي كاين دابا كبر.

ودعا ساكس ترامب باش يلقى تخريجة دغيا من الحرب، وقال إن مريكان حققات بزاف من الأهداف العسكرية ديالها بعدما تضررات القدرات العسكرية ديال إيران بشكل كبير، وزاد قال إن هاد الوقت ممكن يكون مناسب باش يتعلن النصر ويتدار انسحاب، ويتكالما الوضع بوقف إطلاق النار ولا اتفاق تفاوضي مع طهران.

أخطر حاجة قالها ساكس هي التحذير من سيناريو خطير ديال إلا طولات الحرب ممكن أنظمة الدفاع الجوي الإسرائيلية تضعف ولا تسالي، وهاد الشي يقدر يخلي مدن بحال تل أبيب تحت خطر كبير، وفهاد الحالة ممكن يوقع تصعيد خطير يوصل حتى للتفكير فاستعمال سلاح نووي.

ووصف ساكس هاد الاحتمال بأنه كارثة كبيرة، وقال إن أحسن حل باش يتفادى العالم هاد الشي هو ينقص الصداع وتوقف الحرب.