كود – نتفلكس   //

وخا وصل لـ70 عام،  مستر بين مازال كيضحك عباد الله ،هاد المرة رجع لمنصة «نتفليكس» بمسلسل جديد على شكل 4 الحلقات بعنوان Man vs Baby، بمناسبة عيد الميلاد، كل حلقة كتدوم نص ساعة، وكيتميز المسلسل بالعلاقة بين تريفور بينغلي والطفل الصغير اللي عندو 8 شهور.

المسلسل كيورّي المواقف الطريفة اللي كاتوقع بين الرجل والدري،و مع المواقف ديال الضحك  المسلسل كيعطي أبعاد إنسانية ،تريفور اللي خسر خدمتو وبقى بوحدو فالعيد، كيبان كيطيب وكيهتم بالطفل  ،الشخصيات اللي كترافقو فالقصة بحال الجيران والكوبل وولدهم  كيزيدو بعد إنساني للقصة.

المسلسل كيعتمد  على السكات  والحركات البسيطة بلا حوار ، وهاد الشي لي كيرجع مستر بين قريب لجميع الأعمار والثقافات.  ورا هاد البساطة كاين واحد العمق كيقول بلّي التواصل الفني  ما محتاجش لكلام بزاف. Man vs Baby كتبين بلّي الكوميديا الخفيفة تقدر تكون وسيلة ذكية باش نوصلو رسائل على التعاطف، الصبر، وحتى على كيفاش شخص واحد يقدر يبدّل حياة شخص آخر بلا ما يحس.