الرئيسية > كود سبور > مسبقين الفرح بليلة.. المنتخب الإسباني مفوج وكيضرب فالشوا قبل ما يلعب ضد المغرب
04/12/2022 22:10 كود سبور

مسبقين الفرح بليلة.. المنتخب الإسباني مفوج وكيضرب فالشوا قبل ما يلعب ضد المغرب

مسبقين الفرح بليلة.. المنتخب الإسباني مفوج وكيضرب فالشوا قبل ما يلعب ضد المغرب

كود سبور//

خرج مدرب المنتخب الإسباني لويس إنريكي باش يلطف الأجواء ويهدن الجمهور الإسباني قبل الماتش ديال ثمن نهائي كأس العالم قطر 2022، الثلاثاء الجاي ضد المغرب، واللي مبرزط الإسبان بزاف خصوصا، من بعد الطريقة الكارثية اللي سالا بها دور المجموعات ملي خسر ضد الجابون.

وتكلم لويس إنريكي مع الجمهور الإسباني، وحاول يبين لهم بلي الأجواء لداخل فمعسكر لاروخا مزيانة والمورال طالع واللعابا تجازو الخسران ضد الجابون، والهدف ديالهم دابا هو يربحو المغرب ويتأهلو لربع نهائي المونديال، وقبل هادشي دارو حفلة اليوم الأحد.

وقال إنريكي فلايف دارو فتويتش بلي خلقو أجواء احتفالية باش يخرجو اللعابا من الضغط وقال: “درنا حفلة اليوم وضربنا الشوا وكلينا اللحم والخضرة، راه كلشي ناضي، واللعابا ناشطين ومتحمسين والمورال ديالهم طالع وكان كيلعبو”.

وكيجي الخروج ديال لويس إنريكي باش يكالمي شويا الشارع الرياضي الإسباني واللي خالعو الماتش ضد المغرب من بعدما قنع المنتخب الوطني المتتبعين بالأداء والنتيجة فالدور الأول وتأهل على رأس لكروب 6 وبالمقابل تعرض المنتخب الإسباني لانتقادات كثيرة بسبب المستوى اللي ظهر به خصوصا مع الجابون حيث خسر وفلت من الإقصاء.

موضوعات أخرى

03/02/2023 08:20

كانت كدير الوساطة فلاسيرونس بلا ترخيص.. محكمة برشيد حكمات على مرا بعام ونص ديال الحبس

03/02/2023 07:00

حيفظي باي باي من الباطرونا بسباب التنوعير والقوالب لي مورط فيها مولاه النعمة ميارة