كود الرباط//
منذ انتخابات 8 شتنبر 2021، تبدلات الخريطة السياسية والحزبية فالمغرب كامل، بنهاية الإسلاميين وصعود الليبراليين، وكذلك فالصحراء بتقليص سيطرة تيار سياسي على جميع الجهات الثلاث الجنوبية، وهادشي تأكد اليوم من خلال الحضور القوي لعدد من الأحزاب فالصحراء.
فهاد الويكاند، حضر حزب التجمع الوطني للأحرار (حزب رئيس الحكومة) بقوة فمدينة الداخلة وصيفط مساجات سياسية للمنافسين ديالو خصوصا حزب الاستقلال اللي مسيطر انتخابيا على الصحراء. الحضور القوي لحزب الأحرار، بان من خلال التواجد ديال 14 قيادي من المكتب السياسي للحزب ورئيس مجلس النواب ورؤساء الفرق بمجلسي النواب والمستشارين، وبتأطير من رئيس الحزب عزيز أخنوش.
الرسالة السياسية لي بغا يصيفط الأحرار من الداخلة، هي أن التعددية الحزبية والسياسية فالصحراء أصبحت واقع، وناس الداخلة بانو على وعي سياسي كبير واستطاعو يلتفو حول الأحرار وقياداتو. حسب مصدر حزبي.
وأضاف المصدر نفسه: “المهرجان السياسي للي نظم الأحرار فالداخلة، خلال المنتدى الجهوي الختامي للمنتخبين التجمعيين بجهة الداخلة وادي الذهب، حضرو فيه 1200 شخص، ومنهم رؤساء جماعات فالجهة عندهم مشاكل فالتدبير وجلسو مع رئيس الحكومة لي عطاهم الوعد والكلمة باش يحلو مشاكلهم”.
الجديد فهاد اللقاء، هو أن رئيس الحكومة أكد للمنتخبين أنه كاع المشاكل لي كيعانيو منها خدام عليها وغايوجد حلول على المستوى الوطني من أجل الرقي بالعمل الجماعي وخدمة الصالح العام.
سياسيا هاد اللقاء كان رسالة لحمدي ولد الرشيد، مفادها “حدك العيون.. الداخلة عندها ماليها”، وهادشي تيأكدو التعاون الوثيق بين الأحرار ورئيس الجهة ينجا الخطاط، المسؤول الاستقلالي الهادئ واللي كيخدم فصمت.
طبعا هاد القوة ديال الأحرار فالداخلة، غايستفد منها كذلك نزار بركة الأمين العام لحزب الاستقلال، للي باغي يدير مؤتمر فظروف مزيانة ويتجنب الضغط القوي ديال حمد ولد الرشيد لي بدات قوتو السياسية فتراجع بالصحراء.
