كود سبور//

فرگع ديفيد إسكودي المستشار الرياضي لملجس مدينة برشلونة مفاجأة كبيرة فقضية استضافة فينال مونديال 2030، وهو ماتش النهائي اللي منافسين عليه المغرب وإسبانيا ضمن ملف الترشح الثلاثي ديالهم لاستضافة المونديال مع البرتغال، وقال أن تيران سانتياگو بيرنابيو ما يقدرش ينظم نهائي كاس عالم.

وخلال حوار دارو إسكودي مع برنامج “توت كوستا”، نقلاتو جريدة ماركا الإسبانية، قال أن تيران سانتياگو بيرنابيو بالعاصمة الإسبانية مدريد، ما عندوش معايير الاتحاد الدولي لكرة القدم، وما غايقدرش ينظم فينال كاس العالم لكرة القدم.

وكمل المسؤول فمدينة برشلونة وقال: “الملعب الجديد اللي كايتبنا بالمغرب (ملعب الحسن الثاني بالدار البيضاء) وتيران سبوتيفاي كامب نو هما اللي عندهم القدرة على استضافة النهائي،  إن منافسنا لن يكون بيرنابيو، اللي مايبقى تيران صغير، ولكن المغرب هو المنافس ديالنا”.