كود هناء ابو علي كازا ////
هاد ليام كاينة فضيحة بطلها مدير عام سابق ل”الامازيغية” محمد مماد واللي دوز سنوات قبل ف”دوزيم”. القضية عند القضاء دابا. الاعلام العمومي فعمومو فاسد. فاسد فعدد من الصفقات اللي كتربحها شي شركات فالانتاج. كل عام لمغاربة كيتعرفو على تقريبا نفس الشركات كتربح صفقات انتاج اعمال درامية او كبسولات وكدوز رمضان. سنوات وشي لمغاربة كيغوتو ويحتجو ماشي على الجودة، هادي مسألة ذوق بل على الحكامة. علاش شركة اكس كتاخذ هاد العينة من البرامج واش من علاقة عندها مع داك المدير او داك المسؤول.
اللي خدام فالاعلام العمومي عارف هاد الشي. عارف مظاهر الترفيحة اللي كتبان على شي مسؤولين. فينما مشيتي تلقى ريحة الفساد عاطية. هاد الريحة كتعطي فشي مديريات وكتقل فاخرى. المهم الريحة عاطية.
دابا هاد الشي عارفينو اللي كيخدم مع هاد القطاع. هاد ليام شي “جبناء” ولات عندهم الشجاعة باش ماشي ينتاقدو الحكومة. هادا حق كاين فالدستور، بل كيطالبو باسقاطها. كيطالبو باسقاط حكومة وصلات بانتخابات كاع الاحزاب السياسية ما اعترضاتش على نتيجتها. ربحات الانتخابات خاصها تكمل ولايتها والحكم مرة اخرى هو الشعب.
غير ما يمكنش تخلي الفساد فالاعلام العمومي اللي انت خدام فيه وما تحيدش البارابول وتشوف جنابك وتكتب واخا غير مرة على هاد الفساد اللي اكيد غادي تكون تقولو فجلسات خاصة مع زملاء ليك فهاد الاعلام العمومي.
ثم من حقك تطلب اخنوش بالرحيل وتهبط تعبأ الناس فالحملة الانتخابية. ولكن انتاقد شوية وزير الداخلية. مرة مرة فاوقات الفراغ سير طل على حلقات دارتها عليه بدرية ف”برلمان”. المفروض دافع على محاكمة لفتيت بسباب الدواصا الخانزين اللي خرجو عليه “برلمان”. الاشادة بيه بالتزامن مع فضحو بنشر الدواصا راه تواطأ مع الفساد. خاص النيابة العامة تتحرك للبحث فهادوك الملفات. راهم خانزين بزاف بزاف بزاف.
دولة الحق والقانون تقتضي منك دير الحد الادنى من المهنية وغير دور طل على اش كيدير بنسعيد وزير الاتصال والشباب والثقافة. كاين اللي فالاعلام العمومي اللي كيطلب اسقاط الحكومة وغادي يكون مصدوم حيث سيدنا طلع اكثر حرص على تطبيق الدستور، وفنفس الوقت واكل مع وزراء فهاد الحكومة.
راه تشوف حتى تعيى وتقول ما قال الشيخ زبير “كاينة حوايج كثيرة فاسدة فمملكتنا العزيزة”. الصمت فساد والانتقائية فساد.
سيدنا قال فخطابو الاخير فافتتاح الدورة الخريفية للبرلمان باللي ما خاصش يكون تنافس او تناقض “بين المشاريع الوطنية الكبرى والبرامج الاجتماعية، ما دام الهدف هو تنمية البلاد، وتحسين ظروف عيش المواطنين، أينما كانوا” وباللي اللي محتاجينو هو “تأطير المواطنين، والتعريف بالمبادرات التي تتخذها السلطات العمومية، ومختلف القوانين والقرارات، لا سيما تلك التي تهم حقوق وحريات المواطنين، بصفة مباشرة” واكد سيدنا فخطاب الجمعة الاخير باللي هادي “ماشي مسؤولية الحكومة وحدها، وإنما هي مسؤولية الجميع، وفي مقدمتهم أنتم، معشر البرلمانيين، لأنكم تمثلون المواطنين. وهي أيضا مسؤولية الأحزاب السياسية والمنتخبين، في مختلف المجالس المنتخبة، وعلى جميع المستويات الترابية، إضافة إلى وسائل الإعلام، وفعاليات المجتمع المدني، وكل القوى الحية للأمة”.
سيدنا جبد الاعلام. طبعا كيقصد بالمقال الاول الاعلام العمومي ديال الدولة. اعلام على راسو ديناصورات بحال فيصل لعرايشي واميين بحال ديال ميدي ا تيفي. خاص تسونامي وتجي روح جديدة فهاد الاعلام. يساليو مع التعليمات. اليوم غادي تسبو هاد لوزير وخرجو وقولها فالتلفزيون وغدا قلبو على هاد الاحتجاجات. اللا. مديريات الاخبار والبرامج الحوارية خاصها تكون سيدة قرارها بنقاش وحوار مع رؤساء ورئيسات التحرير. بخصوص الفساد هاداك خاص المجلس الاعلى للحسابات ولا بلاش كاع شوفو كل واحد شحال كيشد وكيفاش عايش وكلشي يبان
