كود سبور//

بان أن اصابة الدولي المغربي نايف أگرد اللي تعرض لها مع ريال سوسيداد الإسباني فالماتش الأخير ضد فيكتوريا بلزن التشيكي ضمن منافسات اليوروبا ليگ، ماشي خطيرة بزاف كيفما كان كايتوقع كلشي، حيث اللاعب المغربي حاضر مع ريال سوسيداد ضد البارصا فماتش، غدا الاحد، ضمن الجولة 13 من بطولة الصبليون.

وحدد إيمانويل ألگواسيل مدرب ريال سوسيداد، لائحة الفريق ديالو ضد البارصا، ومن بين اللاعبين الـ25 اللي كونفوكاهم لهذا الماتش، كاين المدافع المغربي نايف أگرد، مع العلم أن المدرب براسو خرج الخميس اللي فات من ورا ماتش ريال سوسيداد وفيكتوريا بلزن فاليوروبا ليگ، وقال أن المدافع المغربي توعت فالركبة، وأن الاصابة ديالو مقلقة.

الكونفوكاسيون ديال نايف أگرد فالماتش ديال ريال سوسيداد ضد البارصا، مؤشر مزيان وإيجابي خصوصا أن اللاعب غايجي من ورا هذا الماتش مباشرة للمنتخب المغربي، حيث الناخب الوطني وليد الركراكي كان عيط له مع 25 لاعب اخرين لمواجهة كل من الگابون وليسوتو ضمن الجولتين 5 و 6 من إقصائيات كاس إفريقيا 2025، اللي ديجا مؤهل لها المغرب حيث هو البلد المنظم.