كود سبور//

كبّر الدولي المغربي نصير مزراوي نجم مانشستر يونايتد النگليزي، بالمواطن ديالو حمزة إگمان النجم الصاعد من گلاسكو رينجرز الأسكتلندي، قبل مواجهة الفريقين الخميس الجاي ضمن منافسات اليوروبا ليگ.

وفي تصريح نشراتو له جريدة “ديلي ريكورد”، قال نصير مزراوي: “الناس فالمغرب كايهضرو على الأهداف اللي كايماركي حمزة إگمان فبطولة أسكتلندا، وماشي من السهل تماركي فبطولة مزيانة داكشي علاش كايبان أنه كايخدم مزيان مع رينجرز”.

وكايتوقع نصير مزراوي، أن حمزة إگمان إلى بقى فهاذ المستوى يمشي للمنتخب الوطني المغربي، وقال: “غاتكون شي حاجة طبيعية أنه يطلع للمنتخب الوطني، ولكن هاذ الشي كايبقى اختيار ديال الناخب الوطني”.

وكمل مزراوي، وقال أيضا على ايگمان: “توقيف إگمان واحد من التحديات اللي عندنا، وهو مميز عند رينجرز، وغايحتاجو المدافعين ديالنا للانتباه له وما يعطيوهش مساحة قدام البوطو ديالنا”.

ويعتبر حمزة إگمان من نقاط القوة ديال گلاسكو رينجرز الإسكتلندي، في أول موسم له مع الفريق، وهذا الشي بالأهداف اللي كايماركي واللي قدر بها يعطي الرباح للفريق.