كود – وكالات//

بانت أولى علامات التهدئة د الحرب بين مريكان وإيران، بعدما حبسات واشنطن الضربات الجوية 3 دليالي متابعة، وسط تحركات دبلوماسية باش ما تتوسعش الحرب.

وحسب صحيفة الغارديان، كبار القادة العسكريين الأمريكيين نصحو الرئيس دونالد ترامب يوقف القصف، بعدما اعتابرو أن الحملة العسكرية وصلات للسقف ديالها، وحذروه حتى من نقص مخزون الصواريخ والذخيرة.

هاد الهدوء خلا أسعار النفط تهبط، وفنفس الوقت، كيتسنى ترامب يستقبل رئيس الوزراء الإسرائيلي بنيامين نتنياهو، اللي مازال كيدفع باش تبقى الضربات على إيران، خصوصاً مع الضغوط السياسية اللي كيتعرض ليها قبل الانتخابات الإسرائيلية.

ومن جهتها، علنت إيران أنها حتى هي حبسات الهجمات الانتقامية ضد حلفاء واشنطن فالمنطقة، وقال المتحدث باسم الجيش الإيراني إن هاد القرار جا بعدما وقفات أمريكا الغارات ديالها فاليومين اللي فاتو.

واشنطن كتأكد أن جميع الخيارات مازال مطروحة، وأنها مستعدة ترجع للعمل العسكري إلا فشلات المفاوضات، وفنفس الوقت، بدات مريكان وبريطانيا كيناقشو إمكانية تشكيل تحالف بحري لحماية الملاحة فمضيق هرمز وإزالة الألغام.