كود-واشنطن بوست //

خرجات المريكان، البارح الأربعاء، ببلاغ رسمي فالسجل الفيدرالي كتعلن فيه على مقترح جديد موجّه للمسافرين اللي جايين من 42 دولة مشاركة فبرنامج الإعفاء من الفيزا “Visa Waiver” ، واللي أغلبهم دول أوروبية بحال بريطانيا، فرنسا، ألمانيا، ومعاهم اليابان، أستراليا، وقطر.

المقترح كيقول بأن الزوار خاصهم يقدمّو السجل الكامل ديال الحسابات ديالهم فالسوشيال ميديا خلال آخر خمس سنين، مع جميع أرقام التليفونات اللي استعملو، والإيميلات اللي كانت عندهم فهاد المدة، وزيد على هادشي، الوثيقة كتقترح حتى جمع معلومات على العائلة، وبعض البيانات البيومترية إلى كانت موجودة .

المشروع باقي غير مقترح ومازال مفتوح للتعليقات لمدة 60 يوم قبل ما يتحول لقانون رسمي والمغرب ما داخلش فهاد اللائحة حيث ماشي عضو فبرنامج الإعفاء من الفيزا، وبالتالي هاد القرار ما كيمسّش المسافرين المغاربة مباشرة، باستثناء الشروط المعروفة ديال الفيزا العادية اللي كتدوز من السفارة.