كود -وكالات//
تخيّل معايا ميريكان فالعشرينيات، الدولة زيرات الصمطة ومنعات الشراب بمرة، ولكن بنادم ما مفكاش ولقا واحد التخريجة من السبيطارات والفرماسيانات.
هاد البلان ديال “الشراب الطبي” رجع هو أكبر قالب فالتاريخ ديال ميريكان، حيت القانون كان كيمنع الشراب، ولكن كيسمح ليك طرب الطاسة إيلا كانت عندك لوردونوتس، الطبة ديك الوقت رجعو هما “البارمانات” ، والفرماسيانات ولاو بيسريات.
إيلا شدك غير الرواح، ولا حسيتي بومزوي ولا جاك الستريس او طلعات لك السخانة، كتمشي نيشان عند الطبيب كتخلصو وتاخد “أوردونونس” مكتوب فيها الويسكي ولا البيرة ولا الڤان .
هادشي خلا الفرماسيانات يتطلاو فمدن كبار بحال شيكاغو، حيت كلشي بغا يدخل لهاد البيزنيس لي كيدخل صرف صحيح اما المراكنة لقاوها سبة باش يشربو عاين باين مني كيمشيو يشريو الشراب بصيفة دوا وتا واحد ما يقدر يهضر معاهم.
هادشي خلا ملايين اللترات د لالكول تستهلك بشكل قانوني وبقات هاد الفترة فالتاريخ كتدل على أن القوانين إيلا كانت قاصحة بزاف وغير واقعية، بنادم ديما كيدير طرق ذكية باش يدور عليها ويقضي غراضو.
