كود سبور -RMC //

الدولي المغربي السابق مروان الشماخ تحمس قبل ماتش الافتتاح ديال كأس إفريقيا 2025 بين المنتخب المغربي وجزر القمر، مروان اللي جا يتفرج فالماتش، قال لموقع RMC باللي الأجواء خيالية وكتخلّي أي لاعب يتمنى يرجع للتيران وزاد باللي كان شوية خايف من الطقس، ولكن دابا كلشي داز مزيان، والجو موالم وكل الظروف كاينة باش المنتخب يمشي مزيان فالبطولة.

وعلى الضغط اللي كيعرفوه اللاعبين، أكد الشماخ باللي وليد الركراكي عارف كيفاش يتعامل مع هاد النوع ديال الضغط، حيث اللعب فبلادك وقدّام جمهورك حاجة كبيرة ولكن خاص التركيز وما يكونش تسرّع، وضاف أن الجمهور داخل وخارج المغرب عايش على إيقاع الكان، وهاد الطاقة الإيجابية خاصها توصل للتيران وبخصوص الملعب، ما خباش الشماخ الإعجاب ديالو الكبير، وقال باللي بقى داهش من المرافق والتنظيم، وحسّ راسو بحال  شي دري صغير كيكتشف حاجة جديدة، وزاد قال: “هاد الشي كيخلّيني نبغي نرجع نلعب، وخا غير عشر دقايق، وأكد أن هاد البطولة اللي ما قدرش يشارك فيها غادي يعيشها دابا بالإحساس ديال اللاعبين.

وعلى المنتخبات المرشحة، قال الشماخ باللي السنغال منتخب قوي، وخاص ردان البال منو ومن مصر والجزائر، ولكن الأهم هو أن المغرب يركز على راسو، وإلى دار خدمتو مزيان، ما خاصوش يخاف من حتى شي واحد وختم الشماخ بالهضرة على أشرف حكيمي، واعتبرو واحد من الركائز الأساسية ديال المنتخب، سوا لعب أو ما لعبش، حيث الروح والذهنية اللي كيبيّنها كتفرّح المغاربة وكتعطي قيمة كبيرة للفريق كامل.