كود سبور//

قرر واحد المرفح برازيلي يوصي بالثروة ديالو من بعدما يموت لنجم الكورة البرازيلية نيمار داسيلفا.

وكشفت وسائل إعلام برازيلية أن رجل برازيلي عندو 31 عام، دار وصية بالفلوس ديالو المقدرة بحوالي 6 مليار ريال برازيلي لنيمار داسيلفا، فيها عقارات واستثمارات، وانه تم توثيق الوصية رسميا عند كاتب العدل في شهر يونيو الماضي، وان هاد الفكرة عندو من 2023.

ونقل الاعلام البرازيلي تصريح لهاد المرفح بخصوص الوصية اللي دار لنيمار، وقال: “كانبغي نيمار وكانحس ان القصة ديالو كاتشبه قصتي في مواجهة التحديات، وما ما عندي حتى شي علاقة مباشرة معه، عجباتي العلاقة ديالو مع باه وفكرني بالأب ديالي المتوفي”.

وبالنسبة لنيمار فتقدر الثروة ديالو بحوالي مليار دولار، وحسب الإعلام البرازيلي فما كاين حتى شي رد فعل من اللاعب حتى لدابا على وصية هذا المرفح، ولكن كاينين تكهنات بأنه ممكن يشد اللاعب لفلوس ديال هاد الوصية ويستثمرهم فأعمال اجتماعية، حيث عندو جمعية خيرية للأطفال في وضعية صعبة.