كود مراكش//

أجلات غرفة الجنايات المكلفة بجرائم المال العام فمحكمة الاستئناف بمراكش، اليوما الجمعة 12 دجنبر 2025، الجلسة ديال محاكمة المتهمين فملف ما معروف بـ”شبكة الاتجار فالشهادات الجامعية”، حتى لـ26 دجنبر الجاري، بسبب غياب واحد الموثق اللي خاصو يحضر.

هاد الملف كيتابعو فيه ستة ديال المتهمين، من بينهم أستاذ فكلية الحقوق التابعة لجامعة ابن زهر، ومراتو اللي كتدوز متمرنة فالمحاماة، وموظف فالمحكمة الابتدائية بآسفي وولدو المحامي المتمرن، وزيد عليهم موظف آخر وموثق.

التحقيقات اللي دارتها الفرقة الوطنية كشفت وجود شبهات ديال الرشوة، التزوير، واستغلال النفوذ فولوج سلك الماستر ومنح شهادات مقابل مبالغ مالية. النيابة العامة كانت قد قدمات المتهمين فحالة سراح، ومن بعد تحالو على التحقيق اللي شد الأستاذ الجامعي فالحبس الاحتياطي، وباقي المتهمين تتابعو فحالة سراح مع المراقبة القضائية ومنعهم من السفر.

القضية خلفات جدل كبير فالأوساط الجامعية والقانونية، خصوصا أن الأستاذ المعتقل كان عندو مواقع مسؤولية فآسفي وكمنسق حزبي فعمالة أكادير إداوتنان، وكيتهموه باستغلال منصبو فالتسهيل ديال منح شهادات عليا مقابل الفلوس.