معاذ الحاقد- كود
—-
المشكل بدا فالاول بين لفرانساوي والسلفي وانا بغيت ندخل واخا لمضاربة فالحبس مزيانة كتهرس الملل ولكن مكعجبنيش نبقا نشوف فبنادم مضارب وانا كنتفرج ، السلفي كيحگر علا الفرنسي وكيدي ليه فلوسو والفرنسي خايف منو وسلم ولا كصلي معاه وكيعطيه لفلوس هو يتقدا وانا كنشوف اساكت ، طبيعة الانسان الا لقا رخا كيترخا …. الا لقا شي حد لي يهرف عليه كيديرو فكرشو كيولي ديالو ….
لفرانساوي فعمرو فوق خمسين عام راسو شايب ، رطب وكتحس بيه منتوي فالتصرفات ديالو ، نظارت فوق نيفو كخاف بزاااف و فوجهو كيبان بريء ولكن لمونتيف لي جاي عليه خايب وصعيب بنادم يتعاطف معاه ، مكيجي عندو حتا حد للزيارة قليل فاش كتجي اطل عليه شي حد من السفارة الفرنسية ، علا ما قال ليا كان خدام مديع فشي راديو فرنسي وعندو دارو فالمحمدية و داير وكالة للمحامي لشي فلوس ديالو ، مدوز شي عام ونص وباقي بلا حكام …. تعاشر مع السلفية وسلم اولا كيصوم الاثنين والخميس والاكثرية ديال لوقت كلبس فوقية …. فرحانين بيه حينت سلم وكيفتاخرو بيها قدام الحباسة بلي واحد فرناساوي سلم علا يديهم …. ملي كيقرب الاذان ديال المغرب كيسيفطو ليه لحريرة ولا لحسوة …. كانت كتعجبو بزاااف وكيدوقني معاه … كيقول ليا الصيام c ‘est bien pour la santé….
صراحة السلفية كانو مكاليين عليه الدق … بزاااف ديال الحباسة كانو باغيين غير منين ادوزو ليه وحتا لموظفين كانو محاملينوش حينت مكخلصش الروسيطة ديال سيمانة …. مكانكش كقدر اخرج بوحدو من السيلون …. كلشي كحگر عليه وكلشي كعافو …. انا كنقول يكفي انه فالحبس فهاد العمر وكنظن راه كتعاقب علا الجريمة لي دار الا كان بصح دارها …. فالحبس تقريبا كلشي ناكر كلشي كيقولك انا مداير والو غير ظالميني صعيب تعرف الحقيقة …. فاش تعاشر معايا درستو شويا وناض بغا ياخد لفلوس ديالو من عند السلفي … تحنسر فالفلوس والمحامي لي حاط عندو لفلوس مبقاش جا لعندو وحتا فالتيليفون مبقاش كجاوب …. السلفي نكر وطلع لجبل كيقولانا ما ديت ليه والو وفلوسو راه كالهم …. لفرانساوي معندو حتا دليل بانه عطاه لفلوس …. قال ليا هاد لخنزير لكافر بغا يطيح عليا لباطل … كشاكشو خارجين ومعصب وكيشوف فيا وكحاول اقنعني و يجرني عندو لصفو …. قلت ليه حشومة عليك يلاه كنتي كتصلي نتا وياه ودابا كتسب فيه ونتا زعما كتعرف الله حسن مني …. قوليه ديك اهضرة لي قلتي ليا بالفرونسي وجيه نيشان …. لفرانساوي عارفنا كنهضرو عليه غير كيدور فراسو مارفاهم والو ….. السلفي زاد تعصب ملي هضرت معاه بحال هاكداك …. هو لتحت وانا لفوق فشواياتي … قالي نتا دخل سوق راسك حسن ليك ولا غنوري يماك البرهوش اشنو كنسوا ورش عليا ريوگو … لميمة عندي مقدسة نقدر نتسامح فبراف ديال لحوايج حتا لحنانة لا …. ما حسيتش براسي نقزت لعندو وخرج مني معاد الاخر ….. الجنية لي فيا بدات كتهضر لا وحشا يسير ولا طيرا يطير.. نموت ومنحسش … لي خاف من لقلدا يبقا عليه تقليد …. قلت ليه من نهار لي دخلت وانا محتارمك … نتا حگار وانا غنوريك دابا الحگرة كيف دايرا ها وا بينا ليا …. بقيت كنهلل ودفعتو فصدرو هبط سينيگالي اوقف بناتنا باش منضاربوش …. خرجت من فمي بزاف ديال تخصار الهضرة ” سبيت العالم … البوليس وبالاخص المنافقين بحالو وحتا الملك لي بالنسبة ليه شي حاجة مقدسة ” تقدر تسب الله وميخافش منك ولكن الا سبيتي الملك غيخاف منك …. ملي شافني كسريت وطلقت عليه العروقة فرانا وتراجع ….
بعض المرات كتصدق ديك اللعبة ديال كبرها تصغار …. ملي شفتو تدعق وطيح كواريه وحنا بثلاثة ضدو بديت كنبرد فالسوق وكنهضر معاه بالاسلوب لي غادي يفهمو ….. قلت ليه نتا ماشي راجل ودابا غتشوف معايا الحبس ديال بصح ….. طفيت تلفزة و شعلت گارو و بديت كنسوط ليه فوجهو ….. الا بغيت نكمي غا گارو كنوض من بلاصتي وكنزل وكنمشي حدا لبلاندي ماشي حينت خايف منك لا حينت حتارمتك كبر مني ونتا قلبتي عليها معايا دابا … تسب ليا مي يا ميخي لقيتي تيساع بغيتي توساع واش كسحاب ليك جايبها علا النفقة …. سينيگالي عنقني وجرني حدا لبلاندي …. خاف لا تشبك بونية …. والسلفي تخشا فبلاصتو وجر عليه سيتار …… طبع ديالي مكنضاربش قليل الا لا شي حد حك ليا علا ضبرة وبالخصوص فديك الوقت كنت زايد نغزا فالجهد …. كنت وباقي مكنتصرطتش وحاس براسي …. الوالي ديال كازة صطيتو هربتو ليه ملي وقفت قدامو فاش شدوني … المخابرات والاستعلامات والمقدم كلشي مراقبني … طاكسي حمر مكانش كحيد من حدا دار قبل ما نتشد … يعني سلفي منافق حقير مغيبانش ليا قدامي ….. باش زدت حتاقرتو ديال بصح وعرفتو ميكروب ، المشكل وقع بليل وهو فاق فالصباح مشا ضحا عليا عند مدير الجناح …قاليه “راه معاذ تعدا عليا وراه كسب سيدنا والمقدسات اسي جودي” …
