معاذ الحاقد – كود

—

جناح ستة كانو فيه جوج سيلونات فالاخير  ديال الطابق السفلي  مخصنيهم للوبيات ، كواحد من ولاد الشعب كابر فحي شعبي فمدينة كبيرة سميتها كازة ماكنعرفش شي حاجة سميتها الحرية الفردية ولا المثلية والهوموفوبيا … كنعرف غا لوبيا خاصو يموت  هاد النوع ديال البشر مكيناش بلاصتو ويلا بانت شي حالة من هاد النوع فالدرب كتعيش حياتها فالخفاء والعذاب … حالات ناذرة لي قدرات تخرج للعلن …

السينيغالي هو سبابي، كنت هاني متكي فبياصي كنتفرج فالتلفزة وكنفكر هو يقوليا viens regarder كان شاد معاهم الستون من الشرجم ، كيضحك وسنانو بيضين …

قربت حداه لشرجم مفهمت والو  ، اواه اشنو هاد شي ؟ فشي شكل كيفاش خلاوهم حيين ؟ قمر لابسة سترينغ وكدور علا شراجم  شي كارو شي بنانة ولا خوخة و ايوبة يغلط فيها الانسان الا كان سكران ، كيتحلونو علا بنادم بحالا كتشوف فشي سوق ديال الغلمان فباكستان دايرين استعراض باش يتباعو ومولاهم وسط الدائرة كيقول ليهم تحلونو مزيان باش تجيبو الثمن  ، متحررين ديال بصح واخا مفروض انه دخلوهم للحبس باش يتوبو علا تحلوين …. لابسين لبس ديال لبنات والعكر والماكياج و كاين لي عندها نهود سبحااان الله كيفاش هاد شي ؟ هادي شي ماشي عادي  ؟  …  ، لاسلام  ديالنا كمغاربة كيقولو خاصهم اموتو  ، لفقيه فالجامع عاود لينا علا قوم لوط فالخطبة ومن صغرك باك كيقولك كون راجل وسير جيب لبوطة راك كبرتي وكيفتاخر بيك قدام صحابو نهار العيد بلباس جديد ديال الولاد ماشي ديال لبنات واخا تكون نتا فالداخل ديالك جينيا وهرمونيا لوبيا   ، كيفاش غيدير الاب المغريبي المسلم الا طلع ليه ولدو لوبية خليقة الله  ؟ ياك تالوبييت حرام وعيب وعار وكتجيب شوهة ؟ اشنو التهمة لي دايرين ليهم ؟ لوبيا في الشارع العام ومنافسة العاهرات في سوق الدعارة ؟

ولا تكون شي تهمة زعما ديال مخصكش تكون محلون واخا الوقت محلونا علينا ؟ ياك حنا اصلا شعب محلون وكل نهار كتنيكنا الدولة علاش ميحكموش علينا كاملين بتهمك التحلوين علا  الدولة  ؟ حنا واقيلا هوما الشعب الوحيد فالعالم لي كيقدر افرقنا مردة هربانين كنغوتو سلمية سلمية ولكن الا شفنا شي لوبية نقدرو نتجمعو ونطبقو فيه شرع الله

تبا لنا كم نحن حقراء وحگارة ،دايرين فيها رجال كنترجلو علا بعضياتنا  بحال المقاميع العبيد   !!! بقيت كندور فواحد الحلقة ديال الاسئلة ؟؟؟ اول مرة كيبانو ليا بزاف اواخدين راحتهم كفرق بيناتنا غير حيط ، وكنظن داك الحيط هو حيط الامان بالنسبة ليهم ، حينت كون مكانش الحيط را هداك لي فالشرجم كضحك معاهم و كيعطيهم خوخة باش تحلون ليه شويا حتا يستمني يقدر فأي اللحظة يسمع   السلفي غوت  الله اكبر يتقلب عليهم ويبدا يضرب  حينت خاصو يبين للأخرين بأنه مسلم مؤمن مخرجش علا القطيع وبلي حتا هو ضد … ضد ديال ضد ديال معرفتش شنو

بعض المرات كتفرض علينا الطبيعة ديال التربية ديالنا نشدو الضد فشي حوايج باش ميتخلاش علينا المجتمع ، ممكن يشرب الخمر ويدخن حشيش وعادي  معمرو حط جبهتو الارض ولا عرف لقبلة فين كاينا ورمضان مكصوموش كيفطرو تخبية ولكن قدام ناس خاصو يبان بحالهم حتا هو ايكس من لايكسات …

 ليبيان ديال السيلونات كيتفتحو ساعتين فالصباح وساعتين فالعيشة من تسعة حتا لحداش ومن ثلاتة حتا الخمسة ،  لوبيات كيعطوهم شي نص ساعة او اقل علا حسب الا كان الموظف راشقة ليه ولا لا … بعض المرات مكخرجهم الا كان طالع ليه الدم ولا  عندو توصيات من الموظف ديال الليل بلي دارو شي حاجة وكاتب بيهم تقرير تحريضي ضدهم حينت مخلاوهش ينعس ، فاش كيسدو علينا البيبان كاين شي سيلونات لي فيهم شي ريافة و صحاب اللعاقة كيبقاو محلولين ساعة زايدة والسيلون ديال كوميسير قالو عليه  گارد كور سابق ديال الملك  ، و كانو شي وحدين لي خدامين مع مالين الوقت حتا هوما  كبقاو ادورو فالكروة لبلانطوات والسخارة والبزنازة ، وكاين واحد النوع اخر لي عندهم الحبس طويل وفاهمين الحبس ومعندهمش مع الموظفين كتلقاهم عندهم مع المراسلات والشكايات والكتابة حتا هوما كيبقاو خارجين صحا ولا نقولو الموظفين عياو اولاو كيغمضو عينيهم ، خاصهم غير ما يفوتوش الخطوط الحمراء  حينت حتا فالحبس كاين خطوط  حمراء مخصكش تقرب ليها ، الا قربتي ليها اضربك الضو والفلاقة والكاشو ويقدر يتزادك لمونتيف ….