معاذ الحاقد – كود
—
من لحوايج زوينين لي وقعو ليا فالحبس هو لقيت دياسكي سابقيني وبالخصوص ألبوم ” العشرة والشرويطة … عطوة .. مغاربة عيقو .. كلاب دولة .. دور الموري …
وكل يوم كندوزو فالحبس دياسكي كيزيدو ينتاشرو فيه …. ناس باغا تسمع لهاد خونا لي نايضة عليه ضجة …… الصحافة كدوي عليه والموظفين دايرين ليه الف حساب ….انا راه انسان عادي غير هو ختاريت نعيش حر وبكرامتي ….. الحبس فالدماغ وللي حر حر واخا يخشويه تحت القبر …. بنادم كفرح الا قبلت نريح معاه .. كيشوفو فيا شوفت المعجب بالاخر لي كتخايلو مكغلطش وراه ملاك وماشي بحال بنادم ، بحال الاتباع ديال الشيخ الصمدي … مكتعجبنيش التبعية ولكن هي كاينة بغينا ولا كرهنا ، بنادم كيعيا يدير فيا هو عايق ومتابع لتواحد عدمي وفهمي وديما شاد ضد حتا هو بحال هادوك لي هضرنا عليهم قبل وكتلقاه حتا هو تابع بلاما يحس ….
النفاق والكلاخ من الحوايج لي خلاوني نكون ونتقمص اسم لحاقد علا الوضعية ، كبرت فحي شعبي السميا ديالو مسمينها علا حبس … عكاشة ، وف الحدود معانا كاين درب سيد الخدير و درب فرار واحد انسيك فالاخر …نص ساعة علا رجليك كتلقا لبحر ، دوزت فيه بزاف اللحظات زوينين فالصغر ، كان باقي زوين متوسخش بحال دابا…. باقي عاقل كنت كنمشي انا والمرشوش بلا خبار والدينا وباش ميعيقوش بينا منا كنا كنكونو راجعين كندوزو علا واحد لعوينة باش نحيدو لملحة ديال لما دلبحر ولكن واخا هكداك كانو كيعيقو بيا من خلال لون ديالي لي كيتبدل …. ، و كان واد العبد بيسين سوفاج ديال لمقودة عليهم بناو فوقو دابا موروكو مول ،وكانت حدانا الطبيعة كيخرجو ليها العائلات مع ولادهم ابدلو الجو و الضجيج فالدرب ويتبادلو الخبارات واشنو واقع وحتا هي رجعات كلها عمارات ديال السكن الاقتصادي او شهادة الضعف والسجن
حيديو صنادق ديال الوقيد ودارو لينا صنادق ديال العبيد ، الشباب ملي كخرج من الدرب وكقاد علا لحالة وكيتكلمن باش اضبر علا راسو مكرضاش اقول لشي بنت انا ولد عكاشة الكثير كيقول انا ولد الولفة وحتا لبنات ، حينت اصلا معندهمش حتا حاجة يفتاخرو بيها من غير الاجرام والاجرام والاجرام ، مكين حتا حاجة فالدرب من غير الحشيش والقرقوبي والنفحة ، طاكسي حمر مكانش كقبل اوصلك للدرب الا طلبتيه اقدر اوصلك للدخلة ديالو ، لجينيراسيون ديالي ولي قبل مني كاين لي قرا وتقاتل ودار شي حاجة فحياتو وكاين لي اختار الغربة وكاين لي مات الله يرحمو وكاين لي حياتو دوزها داخل خارج للحبس وكاين لي دوز حياتو فراس درب حاضي الطروفة وفاهم فكلشي السياسة الكورة البنات واخا معمرك ما شفتيه مع شي بنت فاش ما جيتيه هو فاهم ، ديما كيتحسر علا الوقت الزين والايام زينة واخا معرفتش فين دوز هاد الايام زينة هو حدو راس الدرب
فالابتدائي قريت فثلاتة المدارس والاعدادي حتا هو وفالثانوي قريت فجوج وهاد التنقلات لعبات دور كبير فحياتي ، كانت تنقلات بين جوج ديال الاحياء فرق كبير بناتهم ، حي شعبي وحي راقي سميتو المعاريف ، فرق السماء والارض فكلشي ، المعاريف نقي وناس كلشي مؤدب والاكثرية قاري ومكلمن ومكتلقاش دراري صغار سارحين فالزنقة نهار كامل وعندهم الجرادي والمدرسة ديالهم ماشي بحال مدرستنا كلشي مختلف جو اخر عالم اخر بحالا كنتي فكوبا وتلاحيتي لندن ، حاجة وحدة لي تقدر تخسر ليك المنظر فهاد الديكور الزين هوما دراري لي كيبيعو كلنيكس فالزقطوني وحدا زارا ولا العاهرات والقوادات لي كيكونو حدا توين بعض المرات كتسناو فالسواعدة ،
الثانوي قريتو فولادة … العام الاول لي غادي تخلط بنات و اولاد ، حينت قبل كانت غير بنات ..
واخا ولاد مدينة وبلاد وحدة كاين فرق بناتنا تقريبا فكلشي .. فرق فاللباس …. فرق فاللون ديال وجوه …. … اللغة ديالي كنت كنحس بيها معربنة وناشفة وهوما اللغة ديالهم مفرنسة ومكلمنة ، فرق فاللعب و فالقباحة …
المغرب فروقات وفراقي والشعب مفرق ….. وكلشي كيحاول اكون مع الفرقة الغالبة ….. انا ختاريت نكون مع الفرقة المغلوب أمرها وهاد شي خلق ليا الكثير من المشاكل .
