معاذ الحاقد – كود

—

كنت كنتمشا فالساحة اواحد لحظة سمعت شي حد من الشراجم ديال الجناح لاخر كيعيط بسميتي ، هزيت راسي قلبت بين شراجم عرفت الصوت منين جاي ، حققت مزيان والو معرفتوش گلت ليه وي سلام خويا اش حب لخاطر ؟؟؟ حاولت نتفكر فين شايف هاد الوجه ، هاد الوجه مخافيش عليا ، گالي معرفتنيش اخاي الحاقد ؟ انا راه كنت معاكم فحركة عشرين فبراير وكنت كنحضر معاكم الاجتماعات والمظاهرات وكنفرق المناشير ، اوااااه علاش جابوك حتا نتا اخويا ؟؟؟؟ گالي القصة طويلة اخاي لحاقد واش مسمعتيش بالقضية ديال الذئب المنفرد ؟؟؟ انا عندي مدة قليلة هنا فعكاشة جابوني غير باش ندوز الامتحانات وغيرجعوني للحبس ديال سلا ، تعداو عليا هاد الكفرة بالله اخويا ولكن ربي اخلص ربي كبير، هاك هاد لوراقي راني كاتب فيهم القصة ديالي كاملة واشنو وقع الا قدرتي دير شي حاجة من جيهتك اخويا راه تا واحد ما دوا عليا والقضية ديالي مدموصة وانا راه مداير والو سبابي غير كلمة الحق لي داخل حتا نتا علا قبلها …..

فعمرو تقريبا شي واحد وعشرين عام ساكن مع عائلتو فتيط مليل كيقرا الدراسات الاسلامية بكلية ابن مسيك فكازة ، معندوش الصحاب دري سكوتي ومتخلق ، نحيف معندوش لحية غا شي شعيرات خفاف وغير كيضحك بحال غاندي …

صراحة مسمعتش بالقصة ديالو كيف كيعاودها بلسانو واللسان الشهود ديالو ، القصة لي سمعت من خلال “”” الصحافة “”” قصة اخرا ومغايرة وكيصوروه علا انه شي حاجة خيبة وخطيرة بزاف ومرهبة وكتهدد الامن القومي

علا ما كيگول : ” دخلو علينا مع شي جوج ديال ليل للدار  ، كانو بزاف فوق عشرين أ ملثمين ، لميمة مسكينة كسحاب ليها غير شي شفارة غلطو فالعنوان ديال البنك وختي لي يلاه والدة ودراري صغار وانا كلنا ما فهمنا والو ، هادو مالهم اشنو بغاو علامن كيقلبو ؟؟؟

كلشي فالدار تخلع طيحوني للأرض وجوج تلاحو فوقي ، لميمة مسكينة كتبكي خوتي كيغوتي لواليد معرف باش تبلا ، بقاو كيقلبو فالدار رونوها مزيان مالقاو حتا شي حاجة ، هزو لبيسي ديالي ولمداد ديال لامبريمونت اواحد الدوا كانت كتغسل بيه ختي لي يلاه والدة وصباغة ديال ضفر وقرعة ديال ڤا ولصاقة ديال لخشب وداروهم فواحد لبلاصتيكة بيضة شفافة ، وداوني لولاية الامن فالزرقطوني وگالو لدارنا راه غير غنسولوه علا شي حاجة وغادي نطلقوه ، ثلاتة الايام ادارنا كيقلبو عليا معرفنيش فين كاين ، ثلاثة الايام ديال التعديب فدوزيام اطاج ديال الولاية ، كيربطوني من رجلي ويدي وكيعلقوني فالسما بواحد طريقة كتخليك تحس براسك كتقسم فكل ثانية وكتمنى تموت علا تبقا فديك الحالة ، عراوني كامل وعلقوني من رجل بحال لخروف المذبوح لي كيتسلخ وكيگولو ليا عوي ، عوي ياك نتا ذيب عوي ينعل… والكثير من التربريب ولهضرة لخيبة .

لقبوني بالذئب المنفرد حينت كنكون بوحدي  وملقاوش معامن يلصقوني وگالو ليا كتواصل وكدخل فالفايسبوك لمنتديات السلفية الجهادية ،التهمة دارو ليا بأنني كنت كنخطط نقوم بقتل عدة شخصيات وباغي نفجر شي بلايص حساسة والدليل هوما داك لمداد ديال لامبريمونت والدوا ديال ختي لي كانت كتغسل بيه وداك تخربيق وحكمو عليا بخمسة السنين . “

صراحة ملي قريت القصة ديالو بقا فيا الحال بزاف وتفكرت گاع الخوت السلفية لي مشدودين علا والو ، غير حينت كيحضر للخطبة ديال فلان ولا كيصلي فالجامع الفلاني ولا كيمشي لعند فلان ولا كان مع فلان عند فلان ، بزاف القصص لي كتقطع القلب ، معرفتش هيمتا غيحبسو من هاد الطريقة ديال سدان تقابي بأبرياء لإرضاء لي للفوق

” الارهاب ” مغيمكنش ليك تحاربو ب الإرهاب …

اقدر اكون الارهاب غير وهم مكينش غير لعبة ولكن اقدر ديك اللعبة تولد لينا ارهاب حقيقي …

الارهاب هو الظلم هو القمع هو النهب ديال ثروات الشعوب هو مصان الدم ديالنا هو هاد الحالة لي ولينا كنعيشو فيها ، وكما يقول نعوم تشومسكي المخ العلامة الفاهم في هذا المجال : ” الناس جميعهم قلقون لأجل الحد من الإرهاب. حسناً، أعرف حلاً سهلاً للغاية: توقفوا عن ممارسته! ” .