كنت كنشوفو غير من بعيد مكنهضرش معاه بزاف بناتنا غير سلام حتا لواحد نهار اهو يجبد ليا شي تصاور ديالو مع الملك فالحسمية وسط الغيس والفيضانات وگالي بلي كان خدام گاردكور ديال الملك ، طويل وشهب ولد النواحي ديال فاس و عقلية المخزن عندو فالدم ، فالاول كان كسحاب ليا بلي هو موظف فالحبس علا حساب الطريقة باش كانو كيتعاملو معاه الموطفين وكيفاش هو كتعامل الحباسة ، اي واحد وقع ليه شي مشكل ولا خادو ليه الموظفين بورطابل ولا شي حاجة ممنوعة كيقدر ادخل يدير لمزيان  ، كان هو لي مكلف بالمحلبة ديال الجناح وكلشي فيدو ، ولباب ديال سيلونو كيبقا مفتوح وديما مجمع مع مدير الجناح

واحد النهار جا لعندي ريح معايا وبدا كنصح فيا ، كان ما بقا ليا والو ونخرج قاليا : شوف امعاذ هدا راه غير انذار وراه دازو قبل منك عداد امصورو والو والمخزن راه قضيبو طويل ويدير فيك ما بغا … راه ميخسر عليك والو يبقا غير يدخل ويخرج فيك فالحبس حتا تهرس وراه مكخاف من والو وأي حاجة يقدر يديرها كون ذكي راه غيطلقوك بحالك ولكن متخليهمش اجبوك مرا اخرا راه هاد ولاد لحرام ما معاهمش اللعب ، انا خدمت من نيتي ومعقول وسيدنا الله ينصرو كنت عزيز عليه وهوما مبغاونيش نتقرب ليه ، خاصك تعرف انا اش دارو ليا نتا راك ما شفتي والو ، كنت ناعس كنفيق كنلقا راسي فلاكاف ديال شي فيلا فشي بلاصة معرفت فين ولبانضة علا عيني والتعذيب علا الاشكال باش نگول شي حاجة انا معارف عليها والو ، ملي سلاو تعذيب گالو لي غادي تختار ما بين جوج مونتيفات ، يا ايما التجارة فالمخدرات غدوز عليها ثلاثة السنين وغتبقا ساكت ومغتهضر لامع صحافة لا تا شي واحد مخصو يعرف هاد شي لي وقع ويلا بغيتي تدوي غنديرو ليك  الانتماء خلية ارهابية ….

كان كهضر معايا بصوت محدور وناقص وخارج من لداخل ديالو ومرة مرة كيشوف جيهة لباب واش كاين شي حد كيسمع لينا ….

 من بعدغنتلقاه بزاف دالخطرات فالشدة الاولى والشدة الثانية عرفت من خلالو بزاف ديال لحوايج

تحولت لسيلون رقم تسعطاش والسيلون عشرين كان فيه شاقيف بوحدو ،  كنت سمعت عليه قبل ما ندخل للحبس قاتل لمو وختو حاملة وراجلها ، طويل وكيمشي بحال روبو بكثرة الدوايات گلست معاه واحد النهار و عطيتو جوان وشي تويشيات وشعلت گارو وگلت عاود ليا كيفاش عطاتك خاطرك اعشيري تدير داك لبلان …. گاليا هوما لي بغاو بحال هوكداك ديما كيجريو عليا ولا كيدخلوني لسبيطار لمصطين ولا الحبس ، كيتعملو معايا بحال شي واحد براني وكيبقاو انافقو فيا ، انا بعدت منهم مشيت لجديد كنخدم نجار وعايش الحياة تما … واحد نهار دارت ليا فالخوا گلت نمشي نشوف لواليدة ، وصلت لدار فسيدي مومن لقيت ختي وراجلها والواليدة كيفطرو ملي دخلت بحال وحل ليهم لفطور شفتها فوجاهم محملونيش اخويا معاذ ، گالو ليا اجي تفطر گلس تفطر وناضو هوما بداو كجمعو ودخلو سدو عليهم بوحدهم شويا خرجو لعندي مبدلين حوايجهم وگالو ليا غيخصك تخرج حنا بغينا نخرجو … بديت  كنفكر كيفاش كجريو عليا هادو من دارنا دار لواليد الله يرحمو وداك راجل ختي مكنحملوش ، مشيت لكوزينة هزيت جنوي ديال دبيحة وشاقور وبديت براكل ختي هو لول من بعد وقفات لواليدة فطريقي حتا هي جوج ضربات لراس طاحت كاو من بعد ختي حتا هي بدات كتغوت خشيت فيها جنوي فكرشها ودورت مزيان باش اموت لولد لي فكرشها ، ديك ساعة عاد بردت و قدرت نگلس نفطر واخا سمعت ضجيج ديال الناس بداو كتجمعو علا الدار ، فطرت مزيان و غسلت الدم لي كان فيا ولبست حوايج اخرين ديال راجل ختي ولقيت شي فلوس فالتجاكيطة ديالو خديتهم وعدلت جوان ..

سكت شحال بقا كفكر ومضارب مع جوان كيرولي فيه گلت ليه مهربتيش ؟ گاليا علاش غنهرب راه معندي فين غنمشي الحبس حسن ليا راه غير قربت نكمل جوان سمعت الدقان ديال لبوليس حليت ليهم لباب ونعست فالارض ويدي فوق ضهري بحال داك شي ديال الافلام …..