كاين الستة الموظفين ” حراس ”  فالجناح فالنهار اواحد ديال ليل … تقريبا شي 400 سجين فالجناح …. كاين اجنحة اكبر كتوصل فيه لابيل حتا 2000  …. هاد الجناح عازلين فيه غا هوما …. السلفية والمجانين وليجايبها علا روح …. شخصيات كبار وبزنانزة من الناظور معروفين والجنسيات المختلفة ” البانيا ، فرنسا ، اسبانيول، جزائر ، المانيا ، نيجيريا ، سينيگال ،  … الموظفين كانو واكلين طرف ديال الخبز … انا حينت مكان عندي ما يدار كنت كنحسب ليهم ….. كتعيا متحاول تناسهم ومتسوقش ليهم ولكن هوما معاك وحداك و خصم ديالك بطريقة غير مباشرة …، المدير ديال الجناح كانو مهلين فيه صحاب لعاقة مكاين غا لكادوات لغاليين والروايح ولماگن …. نهار الزيارة تقريبا كلشي كخلص …. كل واحد علا حسب جهدو وقدما خلصتي كثر قدما كتكون عندك امتيازات كثر …. المشكل هو انك الا بديتي كدور معاهم كيولفو وكيخصك تعطي لكلشي … لمدير مكقبلش قل من 100 درهم  نهار الزيارة والموظفين لعاديين قانعين بلي قسم الله ….

الا مخلصتيش الاتاوة كتعاني مع الموظفين … علا اقل حاجة تقدر دور عليك صمطة وكيبقاو جارين معاك وكتولي عدو بالنسبة ليهم حينت مكتخلصش ليهم لأوطيل … بزاف ديال الحباسة واخا مقودة عليهم كيخلصو …. بنادم جايبين ليهم دارهم خمسين درهم كيقدر اعطيها للموظفين كاملة ويبقا هو بلاش …. هدا هو الحبس باش تعيش طرونكيل خاصك تخلص … الموظفين لي كيخدمو فالنهار وفالاجنحة تقريبا كلهم كيشدو الرشوة …..

انا معمري عطيتهم شي بون واصلا كانو كخافو مني بزاف وديما كيحاولو يخبيو عليا ….. انا البراءة لي فوجهي وطريقة لبس ديالي كنبان كيليميني كتخليهم يتزگرو …. معلابلهمش بلي كابر فحي سميتو عكاشة …. خاليهم غالطين …. ” استغلوا خوف وكلاخ الشعب باش اديرو لعاقة .،. السجين كون كان واعي بلي داك الموظف راه خدام عندو وهو لي كخلصو … مغيخافش منو بالعكس خاصو يحاسبو ….

علا ما عاودو ليا الحباسة …… الحبس تبدل بزااف دابا  واولات الزامطة ملي جا مسؤول جديد على رأس مندوبية السجون …. كانت من قبل  عكاشة لحشيش والقرقوبي والسلسيون لي فيها مكينش علا برا والثمن بحال برا بحال لداخل …. كانت السيبة كثر والعصابات ديال الدروبة وخاصك تكون كاين باش تعيش …. لحشيش السجناء فديك الوقت هوما لي كانو كدخلوه بعدة طرق … يا ايما فالزيارة ولا كيجي شي صاحبو متافق معاه ويفزع ليه لحشيش فالساحة …. اما دابا لوقت تبدلات اولات عصابة منظمة هي لي حاكمة سوق …. ملي كتعمق بزاف راسك كيتشقق …. مبقاتش ديك لقضية ديال السجين كدور مع الموظف باش اجيب ليه الحشيش  … دابا ولاو هوما كيتفاهمو مع البزناز اجيهم الحشيش من بلاصتو … ماشي بلاكة ولا جوج كيشريو لكوالا ….. حينت ملي كدوز فوق عام فالحبس كتولي حباس وعندك معارف من جميع الاطياف وكتولي تلقا بي بزنازة كبار كنتي غير كتسمع ليهم …. ولبزناز لكبير لي عندو لبلانطوات الضحايا لي كدخلو فبلاصتو لحبس عندو الرباح يتعامل مع الموظفين …. كيولي كاسبهم ومهلين ليه فالدراري …،

كاين اسماء كثيرة لي مطلوقة علا الموظفين …. ومن بين هاد الاسماء كاين الطاكسي …. صعيب طيح عليه وحتا الا طحتي عليه صعيب اتيق فيك …..الطاكسي هو لي كيوصل ليك داك شي لي باغي مع علا برا …. حشيش لكيريسطالة لبورطابل لعاقة ….. اي حاجة فيها لفلوس اوصلها ليك وكل حاجة بثمنها ….. ولبري فيكس …. بلاكة ديال لحشيش لي كتباع برا ب 1300 درهم كيوصلها  ليك هو 3000 درهم  …. كارني دالنيبرولي علا برا داير 5 دراهم كيجيبو ليك ب 50 درهم ويلا كانت الوقت مزيرة كيوصل حتا ل 100 ومكجيبش ليك واحد ولا جوج كيجيب ليك بكية فيها واقيلا 100 وحسب نتا شحال ديال لعاقة غير من النيبرو …. بورطابل لي داير 100 درهم علا برا كيوصلو ليك ب 300 درهم ….. فودكا لي كدير 250 درهم علا برا كتوصلك ب 800 درهم بحالا غتشربها  فلاسيگال …..

ماشي كلشي الموظفين كيقدرو اغامرو باش ادخلو الحشيش …. حينت لي حصل وكان غارج علا المجموعة لي كترأسها رئيس المعقل ونائيب المدير ديال الحبس مكعقلوش عليه كتاصلو بالبوليس …

وكاين عوتاني الموظفين لي مكلفين بالتويشايات لبساط …. تيليكوموند ، ” فيلم ف سيدي ولا كلي” ديال بورنو ، سكوتش مقص مسامر قنب ، لكفتة ، الجرائيد …. هادو حتا هوما كيكونو بوحدهم …. كتلقاه ديما كيخشي فوجهو وفجيوبو الحلوة والديسير لي كيعطيوه الحباسة …. وقانع بلي عطيتيه ….

وكاين الموظفين الشرفاء ولاد الناس لي باغيين ينعسو مرتاحين الضمير مكتعداوش علا السجين …. وكتعتابرو اقلية مقارنة مع الاكثرية شلاهبية كروش لحرام … مكتلقاهمش بناهار كيشدو الليل ولا كيكونو مفزعينهم فالگاريطات لفوق باش ميبرزطوهمش …..حينت لموظف لي مكياخدش لفلوس من عند السجين كيكون معقول ومايخاف من حاتة شي حاجة وكيكون كيشكل خطر علا الموظفين لاخرين ….