رجعوني للحبس ولكن ماشي بوحدي … جابو معايا حمد الدلال …. قالي وحنا راكبين فالسطافيط ….” نتا هو معاذ لحاقد … نتا كاين ودرتي داك شي لي مقدرش شي واحد اخر ايديرو …. خاصني نريح انا وياك راه غنفيدك بزاف ….كنت كنشوفك فجناح ستة وقلت خلي حتا تجيبها الوقت ونهضرو”.

كان لباس مبوهل وفيه ريحت المسك … لحيتو طويلة وقوي البنية صحيح علا خير …. كيهضر بزاف وكيدخل ويخرج فالهضرة … شفتو شي مرات قبل فالجناح ولكن معمرنا هضرنا …. كيكون مفرش فراشة وحاط فيها داك شي لي كيبيع … غا طالقها وكيضحك مع كلشي …. قاليا “خصك تفرح بزاف حينت تلاقيتي معايا …. راه انا هو المهدي المنتظر …. تا واحد ما كيتيق ملي كنقول ليه انا هو لمهدي ولكن نتا ابا لحاقد خاصك تيق فيا ودير يدك فيدي …. شوف لفال اشنو گال بجوجنا فسطافيط وحدة وفي مينوط واحد “

ملي شاف الملامح ديالي تبدلو وبان عليا التعجب زاد اكد وقال ….”اه انا هو المهدي والله رسلني غنبدا الاصلاح من وسط الحبس …. واش مالحظتي والو فالدخلة ديال الحبس و حدا البيرو ديال المدير ؟ راه انا لي درت داك شي …. انا لي رسمت ليهم ملي كان جاي الملك واخا معطاوني والو …. وشفتي دوك الرسومات لي فالحيط كيجيبو الخبرات كاملين وگاع الاسرار ديال الحبس …. خاصك تفهم وتعرف علاش الله ختارني نكون انا هو المهدي المنتظر ؟؟؟ ماشي غير جا وختارني من دون هاد البشر …. ونتا كنت عارفك غتجي و الله مخيبنيش حينت خاصني شي حد اكمل الرسالة ديالي علا برا …. النور والعلم والقوة كيعطيهم الله لمن بغا …. الكهرباء مخصهاش تكون ….. لموسجالة والتلفزة والبورطابلات فيهم اضرار و سلبيات كثيرة …. هادي اعمال الاعداء باش يتجسو علينا …. عندي الخدم ديالي …. مكنحتاج والو ولي بغيتها كتجي حتا لعندي … اصلا انا مباغي والو قانع بهاد شي لي قسم ليا الاله الاكبر … الله نفخ فيا الروح ديالو وحطني فوق الارض باش نكون انا لمرايا ديالو فوقها …. كنشوف داك شي لي مكيقدرش بنادم اشوفو … شفتي هاد لحية الا مشيت حتا حيدت منها زغبة كتنوض الفتنة فالحبس  …. الله عطاني القدرة باش نكون اله فوق الارض … حتا واحد مايقد عليا …. النهاية ديالي غتكون هنا …. قبل ما ندخل للحبس جاني منام بلي خصني نوض ندير شي حاجة وخوتي كيتسناوني فالحبس … اه قتلتو وراسي مرفوع …. الله لي قالي ندير هكداك …. الله هو انا …. الله كاين هنا “

وحط يدو علا راسو زعما راه كاين فالعقل وكمل “شفتي واخا كيضحكو عليا راه قلوبهم بيضا … راه ماشي لخاطرهم هوما مكلخين بحال هوكدا … راه صنعو منهم آلة كتخدم المصالح ديالهم وكتشري من عندهم داك شي لي كتنتج …. المشكل راه كبير اسي معاذ ولا نقولك عشيري انا عارف نتوما صحاب لهيب وصناب لهضرة ديالكم فشي شكل … ياو ياو عشيري خاصنا لفرادة باش نتيري “

بدا كحرك فيديه وكيقول كلمات بإيقاع بحالا كيرابي زعما …. مكنقاطعوش فالهضرة ، قالي “شفتي هادو لي كيبانو ليك …. وبدا كيشوف من واحد الثقب كاين فالسطافيط وانا شعلت واحد الجوان وبقيت كنسمع ليه … ” كاملين راهم ميتين غير الجسد ديالهم هو لي باقي كيدور قدامنا الروح ديالهم مشات عند الله …. كيعذب فيهم الله مخليهم عايشين ….  هادي هي جهنم فوق الارض لي هضرو عليها المنجمين القدامى في مصر …. الا بغيتي تعيش بخير ومرتاح ،…. تحرر تحرر من كلشي ومتبرزط راسك بوالو …… مبادئ اليوم ماشي هما المبادئ ديال غدا والضمير العربي راه ميت معندكش لاش تبرزط راسك وراه باين شكون لي حاكم العالم دابا …. ناس لبارح ماشي هوما ناس ليوما لوقت كتبدل وبنادم كيتبدل معاها … ومولانا جلال الذين الرومي گال ” أعرفك وحسب. ـ أينما كان النور فأنا الشغوف به… وأينما كان الجمال فأنا العشاق.. وأينما كانت الحكمة فهي ضالتي. ـ فقط حين تفعل ما تمليه عليك روحك.. تشعر بهذا النهر العذب يتدفق داخلك.. إنها البهجة الخالصة. ـ لا تجزع إن ذابت وانطفأت كل شموع العالم.. نحن الشرارة التي تبدأ النار. ـ يا قلب.. ﻻ تجالس إﻻ الذين يفهمونك ويعرفون حقيقتك ” وسيدي عبد الرحمان المجدوب كيقول ” قلبي جاء بين المعلم والزبرة والحداد مشوم مايشفق عليه ،يردف له ضربة على الضربة واذا برد يزيد النار عليه “

“دابا غير شد معايا خط واحد راك كدخل وتخرج فالهضرة اخاي المهدي المنتظر ومفهمتكش اشنو بغيتي تقول ؟؟؟ “

فرح بزاف ملي گلت ليه المهدي وتغير فالملامح ديالو و بغا يزيد ابين ليا بلي هو المهدي …..”شنو گلتي ليا مهدي … نتا اول واحد غيگول ليا المهدي … ارا شي گارو وطفي عليك داك جوان  وراك مغتستافد منو والو دابا … خاصك تكون فايق وفأي لحظة تكون علا لقرص ومعرفتي الوقت اشنو تجيب …. الجوانات راه بحال الصلاة ويكيخصهم الطقوس ديالهم ….. خلينا من هاد شي و تخايل معايا غير تخايل معايا انا راه غنعطيك شي حاجة باقي موصلوش ليها الفلاسفة والمفكرين الكبار …. ضروري الفلوس واخا حنا ضدهم ولكن نستعملوهم كوسيلة باش نوصلو للغاية ديالنا لي هي نرجعو اللاسلطوية …. انا راه دوزت كلشي كنت مع لخوانجية فلافاك وعرفتهم علا حقيقتهم وحتا لگواشا كنت شيوعي وطالق شعري وداير بيريه بحال تشي …. ولكن هاد شي كامل مخدامش هادو كاملين مرتزقة وكيديرو راسهم باغيين احررو الشعب و يوريوه الطريق لي كتبان ليهم هي الصح …. من الاحسن كل واحد يدخل سوق راسو ويدير لي بغا ويخرا نار الا قدر يخراها …. كلشي غيبغي اجرك لعندو وبزاف غيحاولو اركبو عليك …. متخليهمش استغلوك وكون مريگل ….”