عييت منتسنا ورا ديك لبنيقة ….. ساعات وانا كنتسنا لتحت … وطلعوني هنا وخلاوني كنتسنا … بعض المرات كنقول مع راسي راه كيديروها بلعاني باش اعصبوني … مخصنيش نتعصب ليهم وكنضحك مع راسي وكنحيا من جديد … التعذيب النفسي الا كانو هوما قراوه فالجامعات انا قريتو فالزنقة ….. دوزو كلشي بقيت غير انا اواحد …. دخلوه من واراها سمعت سميتي …. القاضي ينادي ” نادي على الظنين رقم ستة وثلاتين ” حل لبوليسي لباب لي كفصلني علا لقاعة وقالي تفضل اسي معاذ ….

ضبابة فعيني مكبان ليا والو … كنحاول نحقق فالوجوهة … كنسمع ” معاد معاد تحية ليك الرفيق … حربوشي توحشناك  ” … گاع الناس لي عزاز عليا حاضرين بدات كتوضاح ليا الصورة … الواليد وخوتي وعشراني وعشيرتي و ناس اخرين مكنعرفهمش وشي تيتيزات يا سلام …. صف طويل ديال المحاميين … معاهم محامية متيتزة حتا هي غدافع عليا ….. وقفت قدام القاضي في قفص الاتهام وبوليسي ورايا ومرة مرة كنتلفت عند عشراني ونقلز ليهم …

قالي القاضي حيد لكاسكيط ويدك من جيبك ووقف مقاد راك فالمحكمة والمحكمة عندها الحرمة ديالها … بقيت كنشوف فيه محملتوش … مكرهتش نجاوبو نقول اشمن محكمة كدوي عليها واشمن حرمة … المحكمة كيكون عندها حرمة ملي كتكون كطبق العدل وكترجع الحق لماليه… غنحترم الحرمة ديال المحكمة نهار اولي القضاء مستقل ونهار القضاة يحترمو اليمين والقسم لي اداو فسبيل قضاء نزيه …ماشي قضاء ديال شري تندغ وباك صاحبي والتيليفونات …. قضاء لي كتكون عندو سلطة ماشي غير تابع لجهات عليا ….

قرب لعندي واحد من المحاميين وقالي سي معاذ غير حيد لكاسكيط … قالي لقاضي حنا هنا ماشي ضدك حنا هنا غير باش نطبقو القانون ويلا خلينا كل واحد يدير لي بغا راه مغتبقاش محكمة هادي غتولي سوق … وقاليهم ناديو علا الضحية والشهود ….

دخل الضحية بقيت غير كنشوف فيه وكنضحك … واخا لابس مزيان كيبان فيه الاجرام … راسو شبعان تقرميع وفيه شي تخاسر فوجهو …. داير يديه وراه وحاني راسو اكيتكلبن …..وكنتفكر فاش داوني لبوليس نتواجه معاه فالسبيطار …. هزوني من الحبس مينط ….دارو ليه شهادة طبية فيها ستين يوم …كيعرف يمثل  …. كان مسرح فسرير وملصقين ليه تيوات …. اواااه هاد شي كامل درتو ليه انا ….ومراتو حتا هي كتبكي وكتقول ليا حشومة عليك درتي لراجلي هاد لحالة … اهو كيهضر بصوت خفيف و كينين اي اي مقادرش نهضر اي اي وعتني لكافر بالله …. قاليه لبوليسي واش هو هدا لي ضربك … اه اه اسيدي هو هو …. هرس ليا نيفي اشاف وبغا ا يتم ولادي الله اياخد فيك الحق وبدا كبكي … قالي لبوليسي واش نتا لي درتي ليه هاد لحالة …. بقيت كنشوف فيه معرفت باش نجاوبو … قلت لبوليسي لي بغيتو ديروه ديروه وبقيت كنضحك …

كاين واحد النوع ديال بنادم علا قبل لفلوس كيقدر ادير اي حاجة … هاد نوع ديال بنادم كيقدر يتباع رخيص ولا يعول عليه … هو بالنسبة ليه لفلوس هي كلشي …اقدر اقود ليك مو ولا ختو ولا بنتو ولا مرتو بدم بارد وهانيا …. مية درهم يشهد باطل معندوش مشكل ….

هاد خونا  لي وقع ليا معاه مشكل كاين داير جمعية  وكيضبر من موراها الرزق …. كيجمع دراري لي كيتحشو اكيتقرقبو ومقودة عليهم وكيگول ليهم يلاهو معايا غا نعطيكم ميتين درهم ساعتين وغادين غير تغوتو ضد واحد الخونة باغيين احيدو سيدنا ومكينش لي يدوي معاكم وشعاره ” گول عاش الملك ولا عليك ” ….

باقي عاقل علا كلشي بالتفصيل … داك نهار ميتنساش ليا …. فداك نهار غيتغيرو بزاف ديال الحوايج فحياتي ….كنت يلاه وصلت لدرب حطني ترونسبور ديال لخدمة وغادي قاصد مول لحانوت باش ناخد شامبوان وندخل لدار ناخد دوش … وقف عليا   الضحية قالي بغيت نهضر معاك … كان هو اصاحبو راكبين فطونوبيل ماتريكيل طاليان … قلت ليه معندكش فاش تهضر معايا و بغيت نكمل طريقي لدارنا … نزل وقرب لعندي وحط عليا ايدو وقالي راه غير بغيت نهضر معاك فشي حاجة غتنفعك … قلت ليه حيد يدك ولا نقطعها لعدو ربك راك غتوسخني … جا  واحد  معروف عطوة ديال مالين الوقت فالدرب … قالي معاد سيد راه غير بغا يهضر معاك وبغا ليك غا لخير دوك عشرين فبراير غير غاديين اخرجو عليك … وبدات كتجمع الجوقة علينا فالدرب … العيالات والدراري صغار اشي عشران … ابداو كيغوتو عاش الشعب عاش الشعب ، 100 درهم تفوت تفوت ونتايا تبقا مشموت …. القضية غادية وكتسخن والناس كيزيدو يتجمعو … قلت  لصاحبنا من لأحسن ليك تمشي بحالك راك كتقلب عليها … دراري باغيين غير لي يبدا ليهم ، كانو غيديرو ليه يد من لفوقانية … جريتو وقلت لصاحبو ركبو فالطنوبيل وسيرو بحالكم راه غتشوفو شي حاجة معمركم ما شفتوها …. هدا راه حي شعبي ونتوما هاجمين عليا حدا دارنا ….. بان ليهم داك شي ماشي فصالحهم … جريت دراري وقلت ليهم خليوه يمشي بحالو بلاما يجيب علينا سبتو … غنوليو مطيحين شي روح ومقلبين علا لمونتيف وميستهالش نوسخو بيه يدينا ….

ديمارا طونوبيل مشا بحالو ومشيت حتا انا طلعت لدارنا … من بعدها بشي عشرة دقايق كيتاصل بيا واحد من دراري لي خدامين معاه … دري ولد دربنا كان معاهم  ف الجمعية  وكيوصل لينا الخبار ….