معاذ الحاقد- كود
—-
السينيغالي كان داخل سوق راسو معندوش مع البشرية ، عندو صحابو قلال فالحبس ، عاطيها غير الماكلة والرياضة والعبادة وكيدوش كل نهار ، مدوز شي ثلاثة السنين ديال الحبس ، كيكره المغاربة حيت تعاملو معاه بعنصرية و دوزو عليه العذاب والتكرفيص فاش يلاه دخل ، بالخصوص فالجناح 4 : جناح بويا عمر
وهو مزوج وعندو جوج بنات كيموت عليهم معلق تصاورهم حدا راسو ، بلاصتو ديما مقادة ونقية ، كيفيق مع سبعة ديال صباح؛ كيبدا يعبد وشاد فيديه الإنجيل ، الصلاة ديالو واخا كانت كتفيقني وتبرزطني ولكن كان كيعجبني فيها المقطع الأول، واخا مكنفهمش أشنو كيقول ، كيغني وكيبكي ، بحال اللي كيطلب من الله شي حاجة ولكن بطريقة غنائية كتخليك تحس واحد الإحساس زوين ، إلا غمضتي عينيك تقدر تخايل راسك فشي حقل ديال الدرة فافريقيا والعيالات كيجنيو فالكبال وكيغنيو علا همومهم …..
الحبس هو بنادم ..، بنادم هو لي كيخليك تحس بالحبس، خاصني نبدل هاد السيلون، مبقاش عاجبني ومبقيتش مرتاح فيه ، صعيب عليا نتعايش مع واحد محاملوش، اللي هو السلفي ونبقا نصبح عليه نهار وليل ، أنا فموقع قوة، والإدارة كتخاف مني وكتسايسني، ومكاين غير اتفضل أسي معاد، زيد أسي معاد ،يعني خاصني نفرض عليهم نكون فشي سيلون مرتاح …
أنا إنسان ليلي عزيز عليا نعيش فالليل، وكنبقا سهران … معنديش مع النهار والضجيج بزاف … الليل هو اللي كنقدر نخدم فيه مزيان نكتب نقرا نفكر.
من غير المشكل اللي وقع مع السلفي، كانو كيبرزطوني فالصباح بكري ملي كانو كينوضو يصليو ، فالأول كينوض السلفي ولفرانساوي يصليو لفجر ، الطريقة كيفاش كيصليو كتعصب: لفرانساوي كتحس بيه زربان ملي كيقوم بالصلاة وباغي غير امتا يسالي، بحالا مفيقو بزز، والعربية كتحس بيها تغتاصبات كثر ماهي مغتصبة، والسلفي طريقة القراءة ديالو خالية من أي إحساس ديال التعبد، كتحس بيه ناشف فالتجويد وغير كيدير شي حاجة تعود عليها ، ماكيصليش من قلبو … كيصلي خوفا من الله وجهنم والنار، ماشي كيصلي حبا في الله، وهاد النوع هو اللي تخاف منو.
كيساليو من الصلاة كنحاول نرجع ننعس، غير كنبدا نحس بالحلاوة ديال النعاس كاينوض سينيغالي حتا هو يبدا يصلي … مكنقدرش ننعس، كنعيا مانحاول نهرب السمع ديالي أو والو، داك شي كيزيد يتمجهد، وميمكنش ليا نحبسهم علا الصلاة ديالهم …
الصلاة هي صلة بينك وبين الاله ديالك ، اختي فاش جات عندي لزيارة قالت ليا خاصك تبدا تصلي اخويا وطلب من الله باش القاضي اشوف من حالك … قلت ليها اختي لقاضي راه ما فيدو والو غير بيدق وكيتسنا لحكام من تيلفون ، ودرت ليها خاطرها ، وصليت شي ثلاثة الأيام مع السلفي ولفرانساوي وقطعت …
الواليدة الله يرحمها كانت ملي كتشوفني قطعت الصلاة، كتقول ليا: يا ولدي راه اللي لصلاتو قطع من جهنم ما يطلع ….. بعض المرات كنقول الحمد لله أنها ماتت كون بقات عايشة كون تعذبات معايا مسكينة …. من لحوايج لي كعذبو السجين نفسيا هو كيخليوه اتسنا بلا حكم ، كاين لي مدوز سنوات وباقي بلا حكام … دوزت شي ايام و فالحبس وحددو ليا الجلسة الاولى فالمحكمة … فرحت وقلت بيخير نمشي نشوف عشراني توحشتهم ، كانو عوالين يدوزو داك شي سري ويحكمو عليا بالخف بلاما يخليو داك شي ينتاشر بزاف ولكن مصدقش ليهم لبلان ….فيقوني مع شي سبعة دصباح وقالو ليا وجد راسك راه عندك المحكمة ليوم .. انا اصلا واجد فدماغي … لبست حوايجي وقاديت علا لحالة باش نطلع لمورال لراسي … النقاء والحوايج لي لابس كيلعبو دور ف شخصية ديال بنادم … ، لقيت سطافيط كتسناني .. داوني فيها بوحدي وكانو معاها شي ربعة ديال لماطر دايرين بيها .. اواه علاش هاد شي كامل .. مالني اشنو داير .. كنسمع فالطولكي وولكي هاهو جاي فالطريق لفلانية نحن مارين فالطريق الفلانية المرجو الاستعداد .. ان الملقب بالحاقد معنا … وصلت للمحكمة عطاوني لبوليس اخرين وقالو ليهم هاهو خونا. …
انا غير كنبتسم اكنضحك كنحس براسي انا لي داير عليا لفيلم .. وهاد شي كيزيد يعطيني القوة … حطوني فواحد سيلون كبير بوحدي … سولني لبوليسي ماخاصك والو اسي معاد .. حركت راسي بانه ماخاصني والو … مشا اخلاني فداك سيلون … بقيت شي ثلاثة سوايع كنتسنا … باكية گولواز قريبة تسالي … انا علا الاعصاب ديالي ، كنحاول نهرس الملل مع راسي … قريت تقريبا گاع داك شي لي مكتوب فالحيط وكان خاصني حتا انا نكتب شي حاجة ونخلي لاطراس … مكانش عندي باش نكتب ولكن طاحت ليا فكرة فراسي حمقة …
