معاذ الحاقد- كود

—

ديمارا ” صاحبنا” الطونوبيل مشا بحالو ومشيت حتا انا طلعت لدارنا … من بعدها بشي عشرة دقايق كيتاصل بيا واحد من دراري لي خدامين معاه … دري ولد دربنا كان معاهم ف الجمعية  وكيوصل لينا الخبار ….

قالي الو معاد راه جاو لبوليس  و الاسعاف  وراه كيقول نتا لي درتي ليه هاد شي …. وراه غيسفطك الحبس اخويا …..

خرجت من دار لقيت جوقة … ومشيت قاصد لبلاصة لي فيها لبوليس الومبيلونص وناس ديال الدرب غاديين معايا …. وصلت قالي لبوليس خاصك تمشي معانا … هضرو شي عيالات متمشيش معاهم امعاذ وحنا راه كلنا شاهدين بلي نتا ما درتي والو … ويلا هضرو العيالات مبقات هضرا … لمرا الا وقفات معاك متخليكش فنص الطريق …. بزاف ديال المراوات طلعو حسن من شي ذكورة …. قلت للبوليسي سيرو وحنا غندوزو عندكم للبوسط ديالكم ….

عياو معايا الناس باش نقلب ستة تسعود وبلي هاد شي لي كندير راه مخدامش …. الواليد قبل ما نتشد بشي عشرة ايام بقا قاني عليا حتا دخلت لدار …. كنت جاي مغلغل وكاعي يلاه سالينا اجتماع ديال حركة  20  والراس غيتفرگع بالهضرة … الواليد كنتفادا نتلاقا معاه … بالاخص فبحال هاد اللحظات غيزيد افرگع ليا راسي …. قالي اوليدي سمعت شي هضرة بلي راك كتهضر فالاغاني ديالك علا الملك … راه اغبروك اولدي راه المس بالمقدسات صعيب اولدي …. خليك شاد فخدمتك وبعد من المشاكيل … المخزن واعر اوليدي راه والله ما يعقل عليك واحد  ….

وهادوك الملحدين لي فالحركة راه غيخرجو عليك راه يلاه جا لعندي القايد وهضر معايا عليك وجاب ليك هاد الورقة ” ورقة ديال المنع من التظاهر كانت كترسلها لينا وزارة الداخلية كل نهار الجمعة  ” ….

قلت ليه ” لواليد هادوك لي كيوصلو ليك لهضرا كنعرفهم واحد واحد وراهم ماشي رجال ، كون كانو رجال غيجيو اهضرو معايا فاص و هاد لمرة الا جا ععندك القايد قوليه مكنعرفوش وراه بالغ منك ليه وشكرا بزاااف الواليد حينت كبرتيني راجل وباقي مسكني معاك واخا  ولات عندي ربعة عشرين عام وتعذبتي علا قبلي وزايدك مشاكيلي .. خليني دابا نتحمل مسؤوليتي …. حنا جيل جديد الواليد  ونتا راك كتعرف الله حسن مني وحافظ للقرآن . …. جبد ليا غير سورة وحدة لي كتقول خاصني نسكتو علا الحق  و بلي خاصنا نقدسو  انسان  … ماعرف باش اجاوبني …. اول مرة كنقدر نهضر معاه بهاد الطريقة … كنهضر بحرقة وكنبكي وكنحاول نخبي الدموع … مكنحملش اشوفني شي حد كنبكي واخا هدا الواليد ماشي شي واحد اخر ….قالي دبر راسك وانا راه مغنتبعكش للحبس الا تشديتي ….

مشيت لبوسط ديال لبوليس وكانو معايا بزاف ديال الناس باغيين اقدمو شهادة ديالهم …. فالباب ديال لكوميسارية لبوليسي دار راسو معارفش اشنو واقع قالينا اشنو عندكم … بدا كهضر كلشي فخطرة وحتا الدراري صغار باغيين اشهدو ” خونا معاد حنا معاك … انا ماشي بوحدي … واخا الناس كيخلعوهم البوليس واقفين معايا ومخايفينش من العواقب …. قالي لبوليس دخل بوحدك وتسناوه ننتوما هنا ….. دخلوني لواحد لبيرو جاو طلعو ليا شي ربعة وقالي واحد فيهم تسنا شويا حتا يجي ضحية ونواجهوك معاه … بقيت كنتسنا شي ساعة فداك لبيرو والبوليس كيتسناو الناس تفرق باش يديوني لكوميسارية الدار الحمرا ….. ولكن الناس كتزيد تجمع والعشران كيدورو الخبار …. دخل عندي واحد لبوليسي واقيلا شاف ديالهم قالي خلي لينا النمرة ديالك وحنا غنعاودو نتاصلو بيك ملي ايجي ضحية …..

معمرني لعبت دور الضحية علا شي واحد … فالدرب عندنا ممنوع تكون ضحية … ضحية ديما مقموع خاصك تجيب عزك فالكروة راسك ويلا مشيتي عند لبوليس باش تشكي كدور عليك الصمطة …. لبوليس كنت كنتسنا منهم ابداو افرشخو فيا ولكن كانو كتسناو شي حاجة … شي حاجة من لفوق

خرجت من لكومسرية تفرقو الناس مشيت بحالي … شويا كيعاودو يتاصلو بيا اجي راه جا ضحية اجي باش تواجه معاه ….

كان بإمكاني نهرب ولا نتخبا …. ولكن رجعت علا نيتي …مكانش علا بالي غيدار ليا القالب … كنقول مع راسي مديرش متخافش … وهوما كيقولو مع راسهم انا داير ليهم ضجيج  وخاصني نخاف …. الشعار ديالي فالحياة ” الربح ربح والخسارة حتا هي ربح ” …. علاش غنخاف ياك كيانة موت وحدة ….. نموت علا داك شي لي كنبغي …. نموت حر واخا وليت كنبان غريب لشي ناس ولفو العبودية والنفاق ويكونو مع الجهة الغالبة ….

قلبي بدا كيرجع لبلاصتو بديت كنولف الجو ديال القاعة … من بعد الضحية دخلو الشهود …. انا كانو معايا شي ثمنية الشهود اهو الشهود مجاوش ليه ….. المحامي ديالو طلب التأجيل حتا يحضرو الشهود …. المحاميين ديالي طلبو سراح مؤقت … وكيل الملك قال ميمكنش بتاتا نعطيو لمجرم خطير السراح المؤقت …. القاضي اجل الجلسة ورفض طلب السراح …. كتزيد تعرف القضاء وشي بعضين  من القضاة علا حقيقتهم وشحال كيوليو ابانو ليك صغار …. واخا هوما قراو وعندهم مناصب كبيرة … غير الشوفة ديالي كانت كترعبهم ….. سلات الجلسة ولمح ليا لبوليسي باش نزيد قدامو  ……. جمعت يدي وهزيتها لفوق وغوت عاش الشعب وخرجت بحالي …….