معاذ الحاقد- كود

—

عطاني السلفي الكارو و قالي “هاك الله يعفو عليك من هاد شي”

بقا كايقلب ف جيوب  السروال القندريسي لي لابس بون ديال عشرة الدراهم ، و البون  هو  ورقة صغيرة بيضا مطبوع فيه بالازرق وكاين  فيها ثلاتة الفئات : خمسة، عشرة و عشرين   وقال ليا هادا لي ملاصق مع السيلون  راه سميتو منير وراه كيبيع الديطاي .

شريت بيها من عندو سبعة ماركيز وخليتهم حتا نعسو وقاديت واحد لوريقة بالغلاف ديال لباكية ماركيز وعدلت جوان ، شعلتو كيف تكيفت ثلاتة النترات طرت و بديت كنرجع سينتا لور وتفكرت داك خونا لي كان داخل سكران لكوميسارية وكيسب فكلشي ” وااا ولاد الكلاب الله ينعلكم  ، نتوما حكارة شديتو ولد دربنا  معاذ حينت غنا علا الملك وهضر علينا وعلى حقنا  …   ”

كان يقولها بواحد الطريقة عصبية وبصوت عالي ،  شدوه البوليس فرشخوه مزيان  كلو ولا دمايات وجا ليه ” با مصطفى ” وهو  بوليسي معروف فالدار الحمرا قاليه “مبغيتيه تهنينا  راه غادي نصلب ز… بوك مع لكارا حتا لصباح وغير غادي تسحى يا لميخي غادي تندم علا هاد لهضرة لي كتقول ، باغي تمشي لحبس توحشتيه  واخا غا صبر ها نتا غادي ….

كان كلشي كيتفرج امقادر ادير والو ، خونا عريان من لفوق ، صلبوه فالقضبان  حدا فين كنت محبوس وكبو عليه لما بارد ومزال زايد فيه كسب وكعاير فكلشي ، تلفت دار لعندنا  شافني وهو يتصدم لحت ليه سيجارة وبقا مضارب معاها شي نص ساعة حتا هزها برجليه .

عيطت للبوليسي قلت ليه صافي غير حيد ليه داك شي وجيبو لعندنا علا حسابي مبقيتيش غتسمع صوتو ، قالي راه غادي ابرزطكم راه هاد ولاد لق… اسي معاد سرهم غير بحال هوكدا ، بقيت كنهضر معاه وقنعتو حتا حل حليه لمينوطات وجابو لعندنا ، كيف دخل بدا كيعنق فيا وكيسب عوتاني ” اش بغاو عندك نتي دري زوين ولد داركم وباغي لينا غا لخير واللهما نخلي ربهم انعسو ليوما “مشا عوتاني ضبر فسيورا وبغا يشنق راسو .

شراب لمغاربة مقود بنادم مكبقا يبان ليه والو حتا يخرج داك لغضب لي عندو او اي حاجة مكبوتة عندو فالداخل ديالو  ، بقيت  كنهضر معاه وكنقول ليه  دير غا بوجهي وهاك هاد جوان صيبو ، غير سمع جوان وجهو تبدل بحال ربح مليار فالتيرسي فرح متوقهاش مني قاديت ليه بلاصا حدايا عدل ورقة من نيكلاج وعدل جوان ، تكيفنا  تكالما وبدا كعاود للحباسة عليا ، كانو شي وحدين سامعين بيا  ولكن مكعرفونيش فوجهي قاليا راه نايضا بلبالا عليك برا ، واش مسمعتيش صوت ديالهم ؟

عندو لحق من قبيلا وانا كنسمع كلنا كلنا حاقدين غير ديونا كاملين ، احساس مقود التبوووووريييشة ، واخا بوحدك بين ربعة لحيوط كتحس براسك فيك بزاف وماشي بوحدك واخا خايبة من واحد الناحية يوليو فيك بزاف حينت كيولي صعيب ترضي راسك وتقدر تنساه الا بقيتي تابع الاخرين ، بقيت سارح كنفكر وهو يقول ليا” الله يعز بيك سمعنا داك ديسك ديال كلاب الدولة ولا شي ديسك من عندك راه والله تا نموتو معاك  هنا يا اخويا معاذ”