ترويها ل”كود” ندى الجبلي كود /////

غير كانفيق الصباح كانشعل واحد البيست ديال الموسيقى فتيليفوني و كانعيش معاها تقريبا كاع الدياسك بلونكلي واخا اللغة مامعاونانيش و لكن كايعجبني نسمع لشي مغنيين فحال سيل و باري وايت … هاد باري وايت بالضبط عندي معاه قصة.

الواليد كان فاش كايجي عطلة كايجيب معاه شي كاسيطات ديال هاد المغني و كايطلقهم فالدار على النبوري، الأغاني ديالو كانشم فيهم ريحة ديك القهوة ديال الفطور، طبعا داك الوقت كانو كايجيوني ما أغاني ما والو حيت أنا باغا نسمع لدوك الأغاني ديال فاتيفلوغ لإهاب توفيق و تامر حسني روبي و نشطح على اخصمك آه … أسيبك لا …! و لكن فاش كبرت شوية و من بعد مامات الواليد واحد النهار وانا كانقلب فشي خش ديالو لقيت الكاسيطات ديال هاد باري وايت و قلبت على السمية ديالو فيوتوب و طلعو ليا الدياسك ديالو، فاش سمعتهم حسيت براسي سافرت عشر سنين اللور و لقيت راسي فدوك الصباحات ديال الصيف فاش كانكون صابحة ناعسة و كانسمع الصوت ديال باري وايت فالدار مخلط مع اللغط ديال الواليد و الواليدة و ريحة القهوة لي كادخل عليا تال بيت …
عندو واحد الأغنية سميتها
kiss and say goodbye !

زعما” بوس و قول باي باي”، كان فالاول اللحن ديالها كايعجبني و من بعد طلبت واحد صاحبني تشرحها ليا و فهمت الكلمات ديالها و حفظتهم شوية، فواحد المقطع كايقول:
We have been meeting here so long
I guess what we’ve done all was wrong
Please darling, don’t you cry
Let just kiss and say goodbye
لاترجمتها للدارجة غاتعطي
دوزنا بزاف ديال الوقت اونسوبل
كانظن داكشي لي درنا كان غالط
عافاك آ حبي ماتبكيش
أجي نتباوسو و سير فحالك
ههه فحال شي ديسك ديال الراي ناقصاها غي ديك ” آياو هادي ! فخاطر ناس عنابة و لافامي بوكدرة و ناس مارساي واحد واحد”

ماعرفتش علاش تفكرت هاد الديسك فاش كنت شادة النوبة فالمطار داك الصباح باش ندفع الباكاج ديالي، حدايا ماما عينيها منفوخين بالبكا و الفوق واحد التلفزة مكتوب فيها الخطوط القطرية، و قدامي بزاف ديال الناس تاهوما مسافرين فحالي وسط واحد الجو ديال الكآبة و الصمت.

حسيت براسي هاد المقطع فداك الديسك كايهضر عليا، من الأول كنت كانشوف الوجود ديالي فهاد البقعة من الكرة الأرضية خطأ و خاصني نصححو و اليوم هانا كاندير أول خطوة فالتصحيح، اليوم غانشد الطيارة و غانمشي لديك البلاد لي شحال من وحدة عاودات عليها…شحال من وحدة مشات مزلوطة و رجعات بفلوسها و شحال من وحدة مشان خايبة و رجعات زوينة و شحال من وحدة مشات قحبة و رجعات أم وليدات محترمة… ماعرفتش شنو كايتسناني تما و لكن لي تقاتل فهاد الأرض السعيدة

غايتقاتل فبلاصة اخرى و يجيبها من ناب السبع، و تانا ماعمري تسنيتها تعطيني حيت لي فحالي مديور باش يضارب على داكشي لي بغا.
ماعرفتش واش البرد و لا الخلعة لي جابت ليا البرد، و لكن كانحس برجلي كارمين واخا لابسة سبرديلة و تقاشر، “سميرة” قالت ليا نمشي لابسة عادي سيرفيط و سبرديلة حيت الرحلة من كازا للدوحة طويلة و غانعيا و تما “هنودة” غاتلاقا ليا باش تديني لفين غانسكن و تصايب معايا الوراق باش نبدا الخدمة فالصالون ديالها، مرا مرا كانطل على الواتساب نشوف تصاور الصالون لي سيفطات ليا، كايبان كبير و فخم و فيه تايلانديات و مغربيات و حتى اللبنانيات خدامين فالماكياج و الكوافير… كانشوف تصاور الصالون باش نتلاها و ندوز الوقت دغيا و لكن فهاد الظروف الوقت ولد القحبة كايولي فالدقيقة عام.

كانحس براسي مشطونة! يوماين مانعستش و ماكانحسش بالجوع، عييت و كانساين غي نوصل تما باش نتنفس، ماكرهتش نسربي هادشي كامل الديوانة ديال المطار، البوليس، الطيارة و نلقى راسي تما، ماشي مهم شنو غانلقا و باش غايسالي هادشي مهم هاد المرحلة ديال “الانتظار” تسالي و نتهنا حيت وليت عايشة على اعصابي.
“الله آ بنيتي و غادي نتوحشك”

ماما حدايا كاتغبن …أصرات تجي معايا للمطار واخا مابغيتش و أصرات تسيفط معايا سطل ديال سلو و سطل ديال الشباكية واخا ماكاناكلهاش، الطريق كاملة و هي كاتبكي عليا و كاع المطار عرفني غادة لقطر، و كاع المطار عرفني مخلية مي بوحدها و كاع المطار ساق الخبار لسليباتي لي خاصني نبقا نصبنهم مانجمعهمش تايدودو ” وا صبني سليباتك لا تولي مشوهانا مع قطر تاهوما” حتى كانسكتها و نصبرها بالفلوس لي غانجيب من تما و المستقبل لي كايتسناني و القصص ديال للبنات لي سبقوني و “هنودة’ لي تاهي كانت فحالي و شوف دابا فين ولات، التهلو لي غانتهلا فيها من بعد، كاتكالما و تسكت و تسها فعباد الله لي فالمطار و تعاود عاوتاني تشوف فيا و تغبن عاوتاني.. و نسكتها تانا عاوتاني.

“راني ماغادياش للحرب واااامي ! راه غي مسافرة و راجعة ! ست شهور تلقايني عندك”

كنت عارفة راسي ماغانرجعش فست شهور و لكن تانوصل تما و نخلي ليها الوقت تولفني بعيدة و نقوليها ماشي ست شهور عام، عام عاد غانقدر نرجع نشوفها.
“و زايدون غا دعي معايا ! لا سهل الله نجيبك عندي لتما”

كانحس بيها بدات كاتكالما ! و كانستاغل الفرصة باش نقلبها ضحك حيت ماعنديش مع الدراما و هاد المواقف

“و زايدون ياك نتي لي كنتي كادعي عليا فاش كانعصبك الله يعطيني غبارة ! ايوا هاهوا سمع منك و هانا غانغبر و تهناي مني”

كان خاصني ندخل للديوانة، آخر محطة قبل الطيارة، تسالمت مع ماما، كانحس بيها معنقاني غاتخنقني، معلقة فيا فحال شي دري صغير، كانسمعها كاتنخصص،بقات فيا و لكن قاومت باش مانبكيش،” ماتبكيش” “ماتبكيش” “ماتبكيش” هاد الصوت لي كنت كانسمع فراسي.
مابكيتش !

غير طلقات مني وانا ندور وجهي و مشيت بالزربة و كانحس بيها مازالة واقفة مورايا حاضياني…الكبدة صعيبة.

تفركت ألبيرتو، شنو غايكون كايدير فهاد الصباح، داز تقريبا شهر على آخر نهار شفتو فيه مورا ماقلت ليه بلي جاتني خدمة فقطر و غانسافر ليها، واخا حسيت بيه تصدم و لكن ماحاولش يأثر على القرار ديالي، مابكاش عليا و ماشدش فيا بيديه و سنانو و تعلق عليا فالبوطو ديال الضو فحال “خديجة” و ماجاش ليا اليوم فالمطار باش يشدني من يدي و يقوليا ماتسافريش … غانتزوج بيك.

النهاية كانت أبسط بزاف، فهمت فيها بلي ألبيرتو واحد بنادم لي ناضج، شارب عقلو و مدريسي على الحياة مزيان… حدو سولني واش مقتانعة بفكرة السفر ؟ واش عارفة شنو غادير تما؟

و قاليا بلي مزيان نسافر و نشوف ناس اخرين و بلادات اخرى و توادعنا بأحسن ح*** غاتبقا لينا سوفونير.

و الطيارة كاتحرك باش تستعد للإقلاع، تفكرت داكشي كلو لي خليت مورايا، لوطيل، سميرة، السعيدي، البنات، كريم، ماما و الحومة و فانطا الحمقة… خليت بزاف ديال الناس مورايا، ذكريات و احلام و لحظات ديال الضحك و الكوميك و المضاربات و التناتيف و خليت حتى راسي تما! خليت ندى و دابا كانحط رجلي فدرجة جديدة من حياتي لي أكيد نهار غانرجع غانرجع لهنا ندى وحدة اخرى.

احسن من هادي ديال دابا ؟

ماعرفتش، مانقدرش نقوليكم.