الرئيسية > آراء > مذكرات كافر مغربي -19-: ف البوسنة، كنت تانعتاقد أنني غا نلقى جيش إسلامي جَرَّار، لا أول له ولا آخر، واقف فالجبهة لمواجهة أحزاب الكفار ولكن…
09/05/2019 10:00 آراء

مذكرات كافر مغربي -19-: ف البوسنة، كنت تانعتاقد أنني غا نلقى جيش إسلامي جَرَّار، لا أول له ولا آخر، واقف فالجبهة لمواجهة أحزاب الكفار ولكن…

مذكرات كافر مغربي -19-: ف البوسنة، كنت تانعتاقد أنني غا نلقى جيش إسلامي جَرَّار، لا أول له ولا آخر، واقف فالجبهة لمواجهة أحزاب الكفار ولكن…

هشام نوستيك-كود//

أول طلة من تحت الكاشة، مازال الدنيا مظلمة، سطاسيونينا فواحد الباركينغ، فرق كبيير مع ألمانيا. لكن أنا ما جيتش نْفْوّجْ، جيت ندير الواجب ديالي الإسلامي. قْمْقْمْنا تْميرات جبناهم معانا، مع واحد العصير ديال المانجو، باينة فيه غير الدشاش ديال الفاكهة والباقي كلو سكاكر. صلينا المغرب والعشاء جمع تأخير، وبقينا تما تانتسناو يجي عندنا الأخ للي غا يقْطّعنا. تا لجوايه الجوج ديال الليل/الصباح، هاد بان أبو خالد السعودي، راجل كبير فالعمر وعندو هيبة، لابس سروال أفغاني ولكن مغطيه بمونطو طويل، خاشي المسواك ففمو، وتايهدر بحال المشايخ السواعدة. رحب بينا بحرارة وبدأ يشرح المستجدات لأبو حمزة.

الكرواتيين ولاو مزيرين اللعب على المجاهدين فالعبور للبوسنة، والخبر للي كفس من هذا، خاصة لطالبي الجهاد، هو واحد الاتفاقية – اتفاقية “دايتون” – يالله تّْسْنات، باش يجمعو ويطويو مع الحرب.

بقينا عاصرين تا صلينا لفجر وتوكلنا عالله، فكراتني الدخلة ديال الحدود البوسنية بالدخلة ديال سبتة، الفرق هو ما كاينش دوك الجحافل ديال صحاب “الكونطربوند”، الدنيا تاتصفر مع النبُّوري، أبو خالد وْرَّانا مين ندوزو، بلاصينا البيكوب، وقف علينا واحد، خرج عندو السعودي تفاوض معاه، ما عرفتش واش دهن السير، ولا سْلّكها بربي كبير. المهم دزنا.

كانت عندي فكرة غبية على البوسنة بسباب الفيديوهات، للي كنا تانشوفو فيهم غير ساحات القتال بحال أفلام الحرب الأمريكية. كنت خايف لا نوصلو، يبداو القنابل يصْبُّو علينا من السما، ولا القنَّاصة يْطْيّرونا واحد بواحد من الشواهق. ربما حيت جيت معطل، والحرب رسميا سالات، ولكن أغلب الطرقان للي دزنا منها كانت عادية جدا، دولة أوروبية متخلفة نسبيا. الناس عايشين نورمال.

أبو خالد بْلْبال، ماكينة ديال الهدرة، خْسّر ليا الفكرة للي كانت عندي على المجاهدين. ڭاع ديك الكاريزما للي كانت تاتشعشع منو فالأول مشات فالباي باي. كون غير بقى ساكت! داير بحال مالين الطاكسيات، تايهدر فجميع المواضيع، السياسة، الزواج، السفر، لفلوس، الرياضة.. واحد الشيطان بدا يوسوس ليا، ياكما الجهاد تايحمّق؟

من بعد شي ساعة ونص ديال الصُّوڭان، وصلنا لواحد لعروبية. ديجا مين قربنا، بانو لينا بزاف ديال العسكر فالطريق، أبو خالد مع عارفنا جداد، شرح لينا أن هاذو العسكر البوسنيين، ناس طيبين، ولكن محتاجين للي يجدد ليهم الدين، خاص شي محمد بن عبد الوهاب بوسني! سطاسيونينا، هبطنا وبقينا نتسناو عوتاني تا جاو الإخوة بواحد الكاميو  صغير، عانقناهم، وبدينا نشارجيو فالكاميو داكشي للي جبنا معانا. الإخوة للي جاو عطوني فكرة على شنو تايتسناني فالمعسكر.

الجنازة كبيرة والميت فار. مرة أخرى الخيال ماشي بحال الواقع. كنت تانعتاقد أنني غا نلقى جيش إسلامي جَرَّار، لا أول له ولا آخر، واقف فالجبهة لمواجهة أحزاب الكفار، لكن لقيت عشرات، واقيلا ما كاملينش تا مئة!!!

بحال الكامبينغ camping كل مجاهد آش تايدير، أغلبهم هازين مصاحف ديال الجيب تايقراو فيها لجمع الحسنات. ما حسيت فديك اللحظة بتا شي دفعة إيمانية، يمكن داك للي تايْفْلّق الشيطان بالحجر فالحج، تايحس بالرعشة أكثر مني. ربما مين تاتكون مْطْلّْع سقف التوقعات بزاف، أي حاجة قْلّ، تاتصدمك.

التركيبة البشرية كانت يمنية سعودية بالأساس، كانو بعض الشيشانيين وشي بركة ديال مصراوة والمغاربيين. كلشي مْحْنْسر تما، ولكن واصلين لسطاج الوحش فالإيمان. الصور ديالهم هي الصور النمطية للي عند أي واحد على المجاهدين، الشعر الطويل، اللحية طويلة أو منتوفة حسب الجينات، وكْميشة ديال الاستثناءات. واحد بوسني ما دايرش ڭاع اللحية!

علي اليمني مشى تكونيكطا مع عشرانو اليمنيين، أنا بقيت لاصق فأبو حمزة، فين ما مشينا تاندير الصواب، السلام السلام، بارك الله فيك، جزاك الله خيرا، أخوكم في الله أبو إسلام.. “الإتيكيت” الإسلامي.

مع الظهر ناض واحد الأخ يْوْدّن، فين يبان بلال، التأثير ديال الأذان كان عندو وقع عجيب عليا، بحال يلا قاد ليا الميزان د الإيمان، للي ضعف بسبب تناقض النظري مع التطبيقي. هاد القضية بقات تاتدير ليا حريق الراس. علاش المؤمنين خصهم ديما يفكرو راسهم بالإيمان، عن طريق الصلاة أو الصيام أو قراءة القرآن؟ علاش خاص ديما الروشارج؟

موضوعات أخرى